කොවිඩ් ව්‍යාප්තිය හේතුවෙන් ශ්‍රී ලංකාවේ සීමා කර තිබු ක්ෂේත්‍ර 09 ක සීමා ලිහිල් කරමින් සෞඛ්‍ය සේවා අධ්‍යක්ෂ ජනරාල්වරයා විසින් නව සෞඛ්‍ය මාර්ගෝපදේශ මාලාවක් නිකුත් කර තිබෙනවා.
ඒ අනුව ශාලාවේ අසුන් ධාරිතාවෙන් 50% ක සීමාවන්ට යටත්ව ගෘහස්ථ සංගීත සංදර්ශන පැවැත්වීමට අවසර දී තිබෙනවා.
කෙසේ වුවත් එළිමහන් සැණකෙළි සහ එළිමහන් සංගීත සංදර්ශන පැවැත්වීමට අවසර හිමි නොවන බවයි නව සෞඛ්‍ය මාර්ගෝපදේශ මාලාවේ සඳහන්ව ඇත්තේ.
ආගමික ස්ථාන විවෘතව තැබීමට අවසර ඇති අතර ආගමික උත්සව සඳහා වන සෞඛ්‍ය මාර්ගෝපදේශ වෙන වෙනම නිකුත් කිරීමට නියමිතයි.
එමෙන්ම සත්වෝද්‍යාන, වනජීවී උද්‍යාන ආදිය විවෘත කිරීමට නව ලිහිල් කිරීම් යටතේ ඉඩ ලබාදී තිබෙනවා.
සත්වෝද්‍යානවල ධාරිතාවෙන් 25% ක් නරඹන්නන් ඇතුළු කිරීමට නව ලිහිල් කිරීම් යටතේ අවසර හිමිවන අතර වනජීවී උද්‍යාන විවෘත කළ යුතුව ඇත්තේ දැඩි සෞඛ්‍යය විධිවිධාන යටතේයි.
එමෙන්ම භෞතිකව සම්බන්ධ නොවන ක්‍රීඩා පුහුණුවීම් කටයුතු සහ ක්‍රීඩා තරග සඳහා ද නව ලිහිල් කිරීම් යටතේ අවසර ලැබෙනවා.
ළමා උද්‍යාන, නවාතැන් ස්ථාන හා බෝඩින් නිවාස, කඳවුරු බිම් සහ ඔට්ටු ඇල්ලීමේ ස්ථානද නව ලිහිල් කිරීම් යටතේ විවෘත කෙරෙනු ඇති.
Pic – Facebook
