මේ වනවිට ලොව පුරා බොහෝ රටවල ඩෙල්ටා කොවිඩ් ප්‍රභේදය පැතිරයමින් පවතී.
ඩෙල්ටා කොවිඩ් ප්‍රභේදය මේ වනවිට රටවල් 98 කින් පමණ හමුවී තිබේ.
සමහර කොවිඩ් මර්දන එන්නත් ඊට නිසිලෙස ප්‍රතිචාර නොදක්වන බවද විදෙස් මාධ්‍ය පවසයි.
මෙතෙක් සිදුකළ පර්යේෂණ වලින් හඳුනාගෙන ඇත්තේ ජොන්සන් සහ ජොන්සන් කොවිඩ් මර්දන එන්නත මගින් මාස 8 ක් පමණ කොවිඩ් වෛරසයට එරෙහිව ප්‍රතිශක්තිය ඇතිකරන බවය.
එසේම එම එන්නත ඩෙල්ටා කොවිඩ් ප්‍රභේදයට එරෙහිව ද සාර්ථකව ක්‍රියාකරන බව හඳුනාගෙන ඇත.
ජොන්සන් සහ ජොන්සන් සමාගමේ පර්යේෂණ සහ සංවර්ධන අංශයේ ප්‍රධානී මතායි මැම්මෙන් පැවසුවේ, “එම කොවිඩ් මර්දන එන්නතේ එක මාත්‍රාවකින් ශක්තිමත් ලෙස ප්‍රතිදේහ නිපදවෙනවා. එහි අඩුවීමක් අපි දැක්කේ නෑ. අපි දැක්කේ කල්ගත වනවිට එය වර්ධනය වන බවක්,” යනුවෙනි.
ඩෙල්ටා ප්‍රභේදය ආසාදිත කොවිඩ් රෝගීන් ගණනාවක් හමු වීමත් සමග ඉදිරි සති දෙක ශ්‍රී ලංකාවට තීරණාත්මක වනු ඇති බවට ලොව ප්‍රමුඛ පෙළ විද්‍යාඥයෙකු වන මහාචාර්ය මලික් පීරිස් අනතුරු අඟවයි.
මහාචාර්ය මලික් පීරිස් පවසන පරිදි ඩෙල්ටා ප්‍රභේදයට, ඇල්ෆා ප්‍රභේදයට වඩා 50% වැඩි වේගයකින් පැතිර යා හැක.
එබැවින් වැඩි දෙනෙකුට ඉතා ශ්‍රීඝ්‍රයෙන් ඩෙල්ටා ප්‍රභේදය ආසාදනය වීමේ ඉඩක් පවතී. මේ වන විට එක්සත් රාජධානියෙන් වාර්තා වන කොවිඩ් රෝගීන්ගෙන් 90% ක්ම ඩෙල්ටා ප්‍රභේදය ආසදිතයන්ය.
Source : ft.com / BBC
