ඔස්ට්‍රේලියානු ජනතාව සේවය කිරීමේදී වඩාත්ම කැමැත්තක් දක්වන ආයතන 10 සම්බන්ධයෙන් සමීක්ෂණයක් සිදුකර තිබෙනවා.
සේවකයන් 6105ක් යොදාගෙන කරන ලද සමීක්ෂණයකිනුයි මේවසරේ ඔස්ට්‍රේලියානුවන් වඩාත්ම කැමති සේවා යෝජකයන් 10 දෙනා සොයාගෙන ඇත්තේ.
ශ්‍රේණිගත කිරීමේ ඉහළට පැමිණ ඇති සේවා යෝජකයින්ට මූල්‍ය ස්ථාවරත්වය, වෘත්තීය ප්‍රගතිය, ආකර්ශනීය වැටුප් සහ පහසු සේවා ස්ථාන පවතින බව සඳහන්.
ඒ අනුව සේවකයන් වැඩ කිරීමට වඩාත්ම කැමති ස්ථානය ලෙස ඩෙලොයිට් (Deloitte) පළමු තැනට පැමිණ තිබෙනවා. දෙවන ස්ථානයට පත්වී ඇත්තේ ඉන්ෂුවරන්ස් ඔස්ට්‍රේලියා සමූහයයි. (IAG Australia)
සමීක්ෂණ ප්‍රතිඵල අනුව නිව් සවුත්වේල්ස් ප්‍රජා සහ යුක්තිය දෙපාර්තමේන්තුව තුන්වන ස්ථානයට පත්වී තිබෙනවා.
දිගුකාලීන රැකියා සුරක්ෂිතභාවය, වෘත්තීය ප්‍රගතිය සහ ආකර්ෂණීය වැටුප් සහ ප්‍රතිලාභ හේතුවෙන් එය සේවකයන්ගේ ආකර්ෂණයට ලක්ව ඇති බවයි පැවසෙන්නේ.
හතරවන ස්ථානය වර්ජින් ඔස්ට්‍රේලියා ගුවන් සමාගමටත් පස්වන ස්ථානය ජී 8 (G8) එඩියුකේෂන් ආයතනයනටත් ලැබී තිබෙනවා.
G8 Education යනු ඔස්ට්‍රේලියාවේ විශාලතම ලැයිස්තුගත මුල් ළමාවිය සහ රැකවරණ සපයන්නා වන අතර, ළමා සුරැකුම් මධ්‍යස්ථාන 430කට වැඩි ප්‍රමාණයක් ඔවුන් සතුයි.
ඔස්ට්‍රේලියන් පෝස්ට් 6 වන ස්ථානයටත්, ට්‍රාන්ස්පෝර්ට් ෆෝ නිව්ස් සවුත්වේල්ස් 7 වන ස්ථානයටත්, 8 වන ස්ථානය නිව් සවුත්වේල්ස් සෞඛ්‍ය ආයතනයටත්, 9 වන ස්ථානය හෙල්ත්ස්කෝප් ආයතනයත්, 10 වන ස්ථානයට ක්වින්ස්ලන්ඩ් රාජ්‍ය දෙපාර්තමේන්තුවත් නම් කර තිබෙනවා.
