අපරාධකරුවෙකු ලෙස වරදවා වටහාගෙන ශ්‍රී ලාංකික සම්භවයක් ඇති පුද්ගලයෙකුට පහර දුන් එක්සත් රාජධානියේ මෙට්‍රොපොලිටන් පොලිස් නිලධාරියෙකුට දඬුවම් නියම කර තිබෙනවා.
34 හැවිරිදි සැකකාර පොලිස් නිලධාරියා 2022 වසරේ නොවැම්බර් 13 වනදා නැගෙනහිර ලන්ඩනයේ ස්ථානයකට පැමිණ තිබුණේ කිසියම් අයෙකු මරණ තර්ජනය කරමින් හැසිරෙන බවට ලැබුණු තොරතුරකට අනුවයි.
එම තොරතුර ලබා දී තිබූ ශ්‍රී ලාංකිකයා සැකකරු බවට වරදවා වටහාගත් පොලිස් නිලධාරියා ඔහු බිම දමා හිසට පහරදී තිබූ බවයි වාර්තා වන්නේ.
රසික අත්තනායක නම් මෙම ලාංකිකයා අත්අඩංගුවට ගෙන ඔහුට බැන වදිමින් හිස පිටුපසට පහර දෙන ආකාරය දැක්වෙන වීඩියෝ දර්ශන ද අධිකරණයට ඉදිරිපත් කර තිබුණා.
සැකකාර පොලිස් නිලධාරියාට මාස 12 කට අත්හිටුවන ලද සති 12ක සිරදඬුවමක් ද පැය 150ක් වැටුප් නොමැතිව සේවය කිරීමට ද අධිකරණය නියෝග කර තිබෙනවා.
එමෙන්ම ඔහු ශ්‍රී ලාංකිකයාට වන්දි වශයෙන් පවුම් 1,500ක් සහ පවුම් 154ක සම්මත අධිභාරයක් ද ගෙවිය යුතු බව සඳහන්.
නඩු විභාගයෙන් පසුව අදහස් දක්වමින් ශ්‍රී ලංකාවේ සම්භවයක් ඇති 42 හැවිරිදි දෙදරු පියෙකු වන රසික අත්තනායක පැවසුවේ මෙම සිද්ධිය තමාට මානසික හා ශාරීරික හානියක් සිදු කර ඇති බවයි.
තමා ක්‍රිකට් ක්‍රීඩාවේ නිරත වන අතර මෙම පහරදීමෙන් පසු උරහිසේ ඇති ගැටලු හේතුවෙන් ක්‍රීඩා කිරීමට ද නොහැකි වී ඇතැයි ඔහු සඳහන් කළා.
