ෆෙඩරල් අධිකරණයේ නියෝගයන්ට අනුකූලව කටයුතු නොකළ හොත් ට්විටර් සමාජ මාධ්‍ය ජාලය ඔස්ට්‍රේලියාව තුළ අවහිර කිරීමේ අවදානමක් මතුවී තිබෙනවා.
විචාරකයන් පෙන්වා දෙන්නේ ඩොලර් 45ක් වැනි සුළු මුදලකට නිමක් නැති ශබ්ද ප්‍රවාහයක් මිස අන් කිසිවක් නිර්මාණය නොකරන උපකරණයක් ට්විටර් හේතුවෙන් ජනතාව සතුවී ඇති බවයි.
සිඩ්නි දේවස්ථානයේ පිහි ඇනුමට සම්බන්ධ වීඩියෝ ට්විටර් වෙතින් ඉවත් කරන ලෙසට ඊ සේෆ්ටි කොමසාරිස්වරිය මෙන්ම ෆෙඩරල් අධිකරණය කළ නියෝග නොසලකා හැරීම හේතුවෙන් මෙලෙස එම සමාජ මාධ්‍ය තුළ තහනම් කිරීමේ කතාබහක් මතුවී තිබෙනවා.
ඇතැම් සෙනෙට් සභිකයන් ද මේ වන විටත් තම පෞද්ගලික ට්විටර් ගිණුම් මකා දමා ඇතැයි සඳහන්.
පසුගිය වසරේ ජූනි මාසයේදී මෙන්ම ඔක්තෝබර් මාසයේදී ද ඔස්ට්‍රේලියානු අධිකරණ මගින් විවිධ කරුණු මත ට්විටර් සමාගමට නිකුත් කෙරුණු අධිකරණ නියෝග ඔවුන් නොසලකා හැර ඇති අතර දඩ ගෙවීමක් ද සිදු කර තිබුණේ නැහැ.
ඔස්ට්‍රේලියා ෆෙඩරල් අධිකරණයේ පමණක් ට්විටර් සමාගම සහ ඊ සේෆ්ටි කොමසාරිස් අතර නීතිමය කරුණු තුනක් සම්බන්ධයෙන් නඩු විභාග වෙමින් පවතිනවා.
ඔස්ට්‍රේලියාවේ ව්‍යාපාර කරන සමාගම් සම්බන්ධයෙන් ඔස්ට්‍රේලියානු උසාවිවලට අධිකරණ බලය ඇති බැවින් ට්විටර් තහනම් කිරීමට හැකි බවයි විචාරකයන් පෙන්වා දෙන්නේ.
ඒ අනුව පසුගිය මාස 12 පුරාවට නිකුත් කෙරුණු අධිකරණ නියෝග එකක් හෝ කිහිපයක් සමග අනුකූලව කටයුතු නොකළේ නම් ට්විටර් රට තුළ තහනම් කිරීමට eSafety කොමසාරිස්වරිය හට බලතල පවතිනවා.
එලෙස තහනම් කළහොත් නව පරිශීලකයින්ට ට්විටර් App එක බාගත කිරීමට නොහැකි වනු ඇති අතර දැනටමත් භාවිත කරන පරිශීලකයින්ට Update කිරීම් ලැබීම නතර කෙරෙනු ඇති.
