විදෙස් රටවල උපත ලැබූ ඔස්ට්‍රේලියානුවන් ගැන අලුත් අනාවරණයක්

ඔස්ට්‍රේලියා ජනගහනය අතුරින් සියයට 30.7ක් විදේශයන්හි උපත ලබන බව නවතම සංඛ්‍යාලේඛණ මගින් හෙළිව තිබෙනවා.

ජන හා සංඛ්‍යාලේඛන කාර්යංශ දත්ත අනුව ඔස්ට්‍රේලියානුවන් වැඩි වශයෙන් උපත ලබන විදේශ රටවල් 10ක් පිළිබඳ තොරතුරු ඉදිරිපත් කර තිබුණා.

මෙම සංඛ්‍යාලේඛන 1996 වසරේ සිට 2023 දක්වා වූ කාලසීමාවට අදාළව නිකුත් කර ඇති අතර ඔස්ට්‍රේලියානුවන් වැඩි වශයෙන් උපත ලබන විදේශ රට ලෙස බ්‍රිතාන්‍ය නම් කර තිබෙනවා.

2023 වසරේ අවසන් වරට සිදු කළ සංගණනයන් අනුව ඔස්ට්‍රේලියානුවන් 961,570ක් එංගලන්තයේ උපත ලබා තිබීම විශේෂත්වයක්.

ඉන්දියාව එම ශ්‍රේණිගත කිරීමේ දෙවන ස්ථානය හිමිකර ගෙන ඇති අතර ඔස්ට්‍රේලියානුවන් 845,800ක් 2023 වසර වන විට ඉන්දියාවේ උපත ලබා ඇති බව සඳහන්.

එම ශ්‍රේණිගත කිරීමේ තුන්වන ස්ථානය චීනය වන අතර ඔස්ට්‍රේලියානුවන් 655,760ක් මේ වන විට චීනයේ උපත ලබා තිබෙනවා.

තවද ඔස්ට්‍රේලියාවේ සිටින විදේශ සංක්‍රමණිකයින් අතර වැඩිම පිරිස චීන ජාතිකයින් වීම ද විශේෂත්වයක්.

විදේශයන්හි උපත ලබන ඔස්ට්‍රේලියානුවන් ශ්‍රේණිගත කිරීමේ දී 4වන ස්ථානය නවසීලන්තයත් පස්වන ස්ථානයට පිලිපීනය සහ හය වන ස්ථානයට වියට්නාමයත් පත්ව තිබෙනවා.

එම ශ්‍රේණිගත කිරීමේ 10 වන ස්ථානයේ ඉතාලිය පසුවන අතර මේ වන විට ඔස්ට්‍රේලියානුවන් 158990ක් ඉතාලියේ උපත ලබා තිබෙනවා.