මැලේසියාවේදී නාවික හමුදා හෙලිකොප්ටර් යානා දෙකක් ගැටීමෙන් සිදු වූ අනතුරකින් දස දෙනෙකු ජීවිතක්ෂයට පත්වී තිබෙනවා.
රාජකීය මැලේසියානු නාවික හමුදාව ලුමුට් නගරයේ දී කළ පෙරහුරුවක් අතරතුර හෙලිකොප්ටර් දෙකක් ගුවනේදී ගැටී අද පෙරවරුවේ මෙම අනතුර සිදුවී ඇති බවයි වාර්තා වන්නේ.
අනතුරින් කිසිවෙකුත් දිවි ගලවාගෙන නොමැති අතර හෙලිකොප්ටර්වල සිටි පිරිස එම ස්ථානයේදීම මිය ගොස් ඇති බව තහවුරු කර තිබෙනවා.
දේහයන් හඳුනා ගැනීම සඳහා ලුමුට්හි හමුදා රෝහල වෙත යවා ඇති බවයි මැලේසියානු නාවික හමුදාව සඳහන් කළේ.
සිද්ධියට හේතුව සොයා බැලීම සඳහා කමිටුවක් පත් කරන බව ද ඔවුන් වැඩිදුරටත් ප්රකාශ කළා.
එක් හෙලිකොප්ටර් යානයක පුද්ගලයන් හත් දෙනෙකු ගමන් කර තිබූ අතර අනෙක් යානයේ තුන් දෙනෙකු ගමන් කර තිබුණා.
පසුගිය මාර්තු මාසයේදී ද මැලේසියානු වෙරළාරක්ෂක හෙලිකොප්ටරයක් පුහුණු ගුවන් ගමනකදී ඇන්ග්සා දූපතට ඔබ්බෙන් වූ මුහුදට කඩා වැටුණා.
එම යානයේ සිටි නියමුවා, සහායක නියමුවා සහ මගීන් දෙදෙනකු ධීවරයින් විසින් බේරාගෙන තිබුණා.