සිඩ්නි හි කාර්යබහුලම වෙස්ට්කොනෙක්ස් (WestConnex) උමං මාර්ගයේ රථ වාහන ධාවන වේග සීමාව මෙම සති අන්තයේ වැඩි කර තිබෙනවා.
මේ අනුව අද එහි වේග සීමාව පැයට කිලෝමීටර් 80 සිට 90 දක්වා වැඩි කිරීමටයි බලධාරීන් තීරණය කර ඇත්තේ.
අදාළ වේග සීමාවන් උමගෙහි ඩිජිටල් සංඥා මත ප්‍රදර්ශනය කෙරෙනු ඇති.
හෝම්බුෂ් සහ බෙවර්ලි හිල්ස් අතර පවතින උමං මාර්ගයේ අන්තර් හුවමාරු වේග සීමාවන්වල කිසිදු වෙනසක් සිදු නොවන බව සඳහන්.
නිව් සවුත්වේල්ස් ප්‍රවාහන දෙපාර්තමේන්තුවේ විධායක අධ්‍යක්ෂ ක්‍රෙයිග් මෝර්ගන් පැවසුවේ මාර්ගය සැලසුම් කර ඇත්තේ පැයට කිලෝමීටර 90ක වේග සීමාවක් සඳහා ආරක්ෂිතව ඉඩ සැලසෙන පරිදි බවයි.
ආරක්‍ෂිත පරීක්‍ෂාවන් සම්පූර්ණ කිරීමෙන් පසුව මෙය ක්‍රියාත්මක කළ හැකි වීම මෝටර් රථ හිමියන්ට විශිෂ්ට ප්‍රතිඵලයක් බව ද ඔහු සඳහන් කළා.
වේග සීමා සම්බන්ධයෙන් ජනතාවගේ ගැටළුවලට තමන් සවන්දෙන අතර ඒවා ප්‍රයෝගිකව ක්‍රියාත්මක කළ හැකි අවස්ථාවන්වලදී ඊට පිළියම් යොදන බවයි නිව් සවුත්වේල්ස් ප්‍රවාහන දෙපාර්තමේන්තුව කියාසිටියේ.
