සිඩ්නි දේවස්ථානයකදී බිෂොප්වරයෙකුට පිහියෙන් ඇනිමේ සිද්ධිය ත්‍රස්තවාදී ක්‍රියාවක් ලෙස සලකා විමර්ශන සිදු කරන බව පොලිසිය පවසනවා.
ඊයේ දහවල් ත්‍රස්ත මර්දන නිලධාරීන් විසින් සැකකාර පිරිමි ළමයාගෙන් ප්‍රකාශයක් ලබාගෙන ඇති අතර පසුව ඔවුන් ඔහුට ත්‍රස්තවාදී ක්‍රියාවක් පිළිබඳ චෝදනා කළ බවයි නිව් සවුත්වේල්ස් පොලිසිය නිවේදනයක් නිකුත් කරමින් කියා සිටියේ.
සැකකාර තරුණයාට ඇප ලබාදීම ප්‍රතික්ෂේප කර ඇති අතර අද දිනයේදී ඔහු රෝහලේදී නඩු විභාගයකට මුහුණ දීමට නියමිතයි.
ත්‍රස්තවාදී ක්‍රියාවක් සිදුකිරීමේ චෝදනාව ජීවිතාන්තය දක්වා සිරදඬුවම් ලැබිය හැකි වරදක් වනවා.
කෙසේවෙතත් පිහි ප්‍රහාරයට ලක්වූ මාරි එමානුවෙල් බිෂොප්තුමා ප්‍රහාරයෙන් පසු ඔහුගේ පළමු පණිවිඩය මගින් ඊයේ කියා සිටියේ සැකකරු කවුරුන් වුව ද ඔහුට සමාව දෙන බවයි.
සැකකාර 16 හැවිරිදි පිරිමි ළමයා කළ පිහි ඇනුමෙන් 53 හැවිරිදි මාරි එමානුවෙල්ගේ හිසට සැලකිය යුතු තුවාල සිදුවී තිබුණා.
එම ප්‍රහාරය වැළක්වීමට උත්සාහ කළ අයිසැක් රොයෙල් පියතුමා ද උරහිසේ තුවාල හේතුවෙන් ප්‍රතිකාර ලබා රෝහලෙන් පිටව ගොස් තිබෙනවා.
පොලිසිය විසින් අත්අඩංගුවට ගෙන ප්‍රතිකාර සඳහා වෛද්‍ය මධ්‍යස්ථානයකට ගෙන යාමට පෙර සැකකාර පිරිමි ළමයා රඳවාගෙන සිටියේ ද ගුඩ් ෂෙපර්ඩ් දේවස්ථානයේ බැතිමතුන් විසිනුයි.
