සිඩ්නි බොන්ඩායි ජන්ෂන් හි පිහි ඇනුමෙන් මියගිය පිරිස වෙනුවෙන් ස්ථීර ස්මාරකයක් පිහිටුවීමට රජය අවධානය යොමු කරන බව ප්‍රාන්ත අග්‍රාමාත්‍ය ක්‍රිස් මින්ස් පවසනවා.
ප්‍රහාරයෙන් මියගිය හය දෙනාට ගෞරව කරමින් ඉරිදා බොන්ඩායි ජන්ෂන් හි පුෂ්පෝපහාර දැක්වු අගමැති ඇන්තනි ඇල්බනීස් ඇතුළු ප්‍රජා නායකයින් අතර නිව් සවුත්වේල්ස් ප්‍රාන්ත අග්‍රාමාත්‍යවරයා ද සිටියා.
මියගිය පිරිස වෙනුවෙන් ඉදිරි සති කිහිපය තුළ ස්මාරකයක් පිහිටුවීමට රජය අවධානය යොමු කරන බවයි අග්‍රාමාත්‍යවරයා සඳහන් කර ඇත්තේ.
ක්‍රිස් මින්ස් පැවසුවේ මෙම ස්මාරකය 2014 වසරේදී ලින්ඩ්ට් කැෆේ වැටලීමේදී මියගිය පුද්ගලයින් දෙදෙනා වෙනුවෙන් මාටින් පෙදෙසේ ඉදි කර ඇති ස්මාරකයට සමාන වනු ඇති බවයි.
පුද්ගලයන් හය දෙනෙකුට මරු කැඳවූ බොන්ඩායි ජන්ෂන්හි පිහි ඇනුම පිළිබඳ ස්වාධීන හදිසි මරණ පරීක්‍ෂණයක් සඳහා නිව් සවුත්වේල්ස් රජය ඩොලර් මිලියන 18 ක අරමුදල් සපයන බව අග්‍රාමාත්‍ය ක්‍රිස් මින්ස් නිවේදනය කර තිබෙනවා.
අග්‍රාමාත්‍ය ක්‍රිස් මින්ස් අද උදෑසන නිවේදනය කළේ අරමුදල් වහාම හදිසි මරණ පරීක්‍ෂක කාර්යාලයට යොමු කරන අතර මරණ පරීක්‍ෂණයට පූර්ණ කාර්ය මණ්ඩලයක් සහ සම්පත් ඇති බවයි.
එම පරීක්‍ෂණය පැවැත්වෙන කාලසීමාව තුළ සිදුවන සියලුම අධිකරණ වෛද්‍ය පරීක්‍ෂණ සඳහා සහකාර නියෝජ්‍ය හදිසි මරණ පරීක්‍ෂකවරයකු පත් කෙරෙනු ඇති බව ද ඔහු සඳහන් කර තිබෙනවා.
මේ අතර අවශ්‍ය කරන තොරතුරු පොලිසියට ලබා දීමට පෙර අන්තර්ජාලයේ පළ කරන පුද්ගලයින් ගැන සැලකිලිමත් වන බව ද අගමැතිවරයා අවධාරණය කළා.
