ශ්‍රී ලංකා පොලිසියේ 36 වැනි පොලිස්පතිවරයා ලෙස දේශබන්දු තෙන්නකෝන් පත් කර තිබෙනවා.
ඔහු අදාළ පත්වීමේ ලිපිය ජනාධිපති ලේකම් සමන් ඒකනායකගෙන් අද පස්වරුවේ ලබාගෙන ඇතැයි සඳහන්.
ජනාධිපති මාධ්‍ය අංශය සඳහන් කළේ ජනාධිපති රනිල් වික්‍රමසිංහ විසින් දේශබන්දු තෙන්නකෝන් පොලිස්පති ධුරයට පත් කර ඇත්තේ ආණ්ඩුක්‍රම ව්‍යවස්ථාවේ විධිවිධානවලට අනුව බවයි.
පොලිස්පති සී ඩී වික්‍රමරත්නගේ විශ්‍රාම යාමෙන් අනතුරුව පොලිස්පති ධුරය පුරප්පාඩු වූ අතර දේශබන්දු තෙන්නකෝන් මෙතෙක් කටයුතු කළේ වැඩබලන පොලිස්පතිවරයා ලෙසටයි.
ඔහුට පොලිස්පති ධුරය ලබාදීම සම්බන්ධයෙන් කතා බහක් පවතින වකවානුවේ විශාල පිරිසක් ඊට විරෝධය පළ කළ අතර අධිකරණ ක්‍රියාමාර්ග ද ගනු ලැබුවා.
කෙසේවෙතත් වැඩ බලන පොලිස්පතිවරයා ලෙසට කටයුතු කරමින් සිටි දේශබන්දු තෙන්නකෝන් පොලිස්පතිවරයා ලෙසට ස්ථිර කළ යුතු බවට ජනාධිපති රනිල් වික්‍රමසිංහ ඉදිරිපත් කල යෝජනාවට පසුගියදා ආණ්ඩුක්‍රම ව්‍යවස්ථාදායක සභාවේ ද අනුමැතිය හිමිවී තිබුණා.
ඔහු වැඩබලන පොලිස්පතිවරයා ලෙසට පත් කළ කාලය 28 වන බදාදා මධ්‍යම රාත්‍රියෙනුයි අවසන් වීමට නියමිතව තිබුණේ.
