වැරදි සහ අසත්‍ය තොරතුරු ප්‍රචාරය කරන සමාජ මාධ්‍ය ජාල සඳහා ඩොලර් මිලියන ගණනක දඩ නියම කරන නව නීති පැණවීමට ඔස්ට්‍රේලියාව සූදානම් වනවා.
ඒ යටතේ සන්නිවේදන සහ මාධ්‍ය අධිකාරියට වැඩි බලතල ලබාදෙන අතර සියලු සමාජ ජාල ඉල්ලා සිටින අවස්ථාවක ලබාදීම සඳහා දත්ත වාර්තා තබාගත යුතු වනවා.
ෆේස්බුක් – ගූගල් – ට්විටර් ඇතුලු සියලු සමාජ ජාල මෙම නව රෙගුලාසි සඳහා යටත් කර තිබීම විශේෂත්වයක්.
දැනට යෝජනා වී ඇත්තේ ආචාර ධර්ම කඩකිරීමට අදාළව එම සමාජ ජාල වැරදිකරුවන් බවට ඔප්පුවුවහොත් ඩොලර් මිලියන 2.75 ත් මිලියන 6.8 ත් අතර දඩයක් පැණවීමටයි.
මීට අදාළව මහජන අදහස් විමසීම ඊයේ සිට ආරම්භ කර ඇති අතර ලබන අගෝස්තු 06 වනදායින් අවසන් කිරීමටයි නියමිතව ඇත්තේ.
ඔස්ට්‍රේලියානුවන් අසත්‍ය සහ වැරදි තොරතුරුවලින් වළක්වා ගැනීමේ අරමුණ ඇතිව මෙම නව රෙගුලාසි හඳුන්වා දෙන බවයි ෆෙඩරල් රජය නිවේදනය කර සිටින්නේ.
