වික්ටෝරියා ප්රාන්තයේ නිවාස ඉදි කිරීම් සමාගම් සඳහා බලපැවැත්වෙන පරිදි නව රෙගුලාසි කිහිපයක් පණවා තිබෙනවා.
පෝටර් ඩේවිස් ඇතුලු ඉදිකිරීම් සමාගම් කිහිපයක් කඩා වැටීම හමුවේ මෙම පියවර ගැනීමට සිදුවූ බවයි ප්රාන්ත අගමැති ඩැනියල් ඇන්ඩෲස් සඳහන් කලේ.
මේ අනුව නව නිවසක් ඉදි කිරීම සඳහා කිසියම් ගණුදෙනුකරුවෙකුගෙන් මුදල් ලබාගැනීමට පෙර ඉදිකිරීම් සමාගම් විසින් රක්ෂණාවරණයක් ලබාදීම අනිවාර්ය වනු ඇති.
වික්ටෝරියානු ගොඩනැගිලි අධිකාරියට නව බලතල ලබාදීමටද යෝජනා වී ඇති බව අගමැති ඇන්ඩෲස් කියාසිටියා.
පෝටර් ඩේවිස් සමාගම කඩාවැටීමත් සමග වික්ටෝරියා ප්රාන්තයේ පවුල් 560 ක් පමණ ඩොලර් දහස් ගණනක් අහිමිකරගෙන ඇති බව සඳහන්.
ඔවුන්ට නිසි රක්ෂණාවරණයක් ලබාදීමට පෝටර් ඩේවිස් සමාගම කටයුතු කර නොමැති බවටයි තහවුරු වී ඇත්තේ.
