පසුගිය වසරේ සැප්තැම්බර් 30 වනදායින් අවසන්වූ මාස 12 ක කාලය තුළදී ඔස්ට්‍රේලියාවේ ජනගහණය සියයට 1.6 කින් වර්ධනය වී තිබෙනවා.
ඒ අනුව 2021 සැප්තැම්බර් සිට 2022 සැප්තැම්බර් දක්වා 418,500 කින් පමණ මෙරට ජනගහණය වැඩිවී ඇති බවයි සංඛ්‍යාලේඛණ කාර්යාංශය නිකුත් කර ඇති දත්තවල සඳහන් වන්නේ.
මෙම කාලසීමාව තුළදී උපත් 302,900 ක් සහ මරණ 188,000 ක් සටහන්වී ඇති අතර උපත් සංඛ්‍යාව සියයට 2.3 ක පසුබෑමක්ද මරණ සංඛ්‍යාව සියයට 10.8 ක වර්ධනයක්ද වාර්තා කර තිබෙනවා.
මරණ සංඛ්‍යාව ඉහළයාමට ප්‍රධාන හේතුව ලෙස හඳුනාගෙන ඇත්තේ කොවිඩ් වසංගතයයි.
මෙම කාලසීමාව තුළදී සංක්‍රමණිකයන් 536,900 ක් රටට පැමිණ ඇති අතර 233,200 ක් රටින් පිටත්ව ගොස් තිබෙනවා.
ඒ අනුව සංක්‍රමණිකයන් 303,700 ක් ඔස්ට්‍රේලියාවේ ජනගහණයට අලුතින් එකතුවී ඇති බවයි සංඛ්‍යාලේඛණ කාර්යාංශ දත්ත වාර්තා පෙන්වා දෙන්නේ.
