වික්ටෝරියා ප්‍රාන්තයේ අද සිට නිකුත් කරන වාහන අංක තහඩු නව මුහුණුවරක් ගෙන තිබෙනවා.
ප්‍රාන්ත රජය සඳහන් කලේ එහිදී නව අභ්‍යන්තර ආරක්ෂක අංගයක් හඳුන්වා දීම හරහා අපරාධ සහ අංක තහඩු සොරකම් අවම වනු ඇතැයි අපේක්ෂා කරන බවයි.
ඒ අනුව නීති විරෝධී ලෙස වාහන අංක තහඩු නිපදවීමද අපහසු වනු ඇති බවටයි අනාවැකි පළවන්නේ.
නව වාහන අංක තහඩුවල විශේෂත්වය වන්නේ අද සිට නිකුත් කෙරෙන වාහන අංක තහඩුවේ කුඩා කවයක් තුළ VIC ලාංඡනය සටහන් කර තිබීමයි.
රසායනික හෝ භෞතික ක්‍රම මගින් ඉවත් කිරීමට තැත් කළද තහඩුවට හෝ නිමි ස්ටිකරයට හෝ හානියක් සිදු කිරීමකින් තොරව අදාළ ආරක්ෂක සලකුණු ගැලවිය නොහැකි බව වික්ටෝරියා ප්‍රාන්ත රජය සඳහන් කරනවා.
ලබන වසර තුළදී නව අංක තහඩු 430,000 ක් පමණ නිකුත් කිරීමට හැකිවනු ඇති බවයි ඔවුන් නිවේදනය කරන්නේ.
මේ සඳහා වික්ටෝරියා රියදුරන්ට අමතර පිරිවැයක් දැරීමට සිදු නොවන බවද වික්ටෝරියා ප්‍රාන්ත රජය ප්‍රකාශ කලා.
(SBS)
