පන්දුවාර විස්ස ලෝක කුසලාන තරගාවලියේ ශ්‍රී ලංකා ඉරණම තීරණය කෙරෙන තරග දෙකක් අද (04) පැවැත්වෙනවා.
නවසීලන්තය සහ අයර්ලන්තය අතරත් ඔස්ට්‍රෙලියාව සහ ඇෆ්ගනිස්ථානය අතරත් ඇඩිලේඩ්හි දී එම තරග පැවැත්වීමට නියමිතයි.
ඔස්ට්‍රෙලියාවට එරෙහි තරගය ඇෆ්ගනිස්ථානය ජයග්‍රහණය කළහොත් ශ්‍රී ලංකාවට අවසන් පූර්ව වටයට පිවිසීමට වැඩි අවස්ථාවක් පවතිනවා.
එමෙන්ම, නවසීලන්ත තරගයෙන් අයර්ලන්තය ජයග්‍රහණය කළ යුතු අතර, හෙට (05) දිනයේදී ශ්‍රී ලංකාව, එංගලන්තය එරෙහි තරගය ජයග්‍රහණය කිරීම අනිවාර්ය වනවා.
නවසීලන්තය සහ අයර්ලන්තය අතර තරගයෙන් නවසීලන්තය ජයගතහොත් ඔවුන් නිසැක වශයෙන් අවසන් පූර්ව වටයට සුදුසුකම් ලබනු ඇත.
ඇෆ්ගනිස්ථානය පරාජයට පත් කරමින් ඔස්ට්‍රේලියාව ජයග්‍රහණය කළහොත් ඔවුන් අවසන් පූර්ව වටයට සුදුසුකම් ලබන්නේ ද නැද්ද යන්න තීරණය වනුයේ ශ්‍රී ලංකා එංගලන්ත තරගයේ ප්‍රතිඵල අනුවයි.
ඊට හේතුව යම් හෙයකින් එංගලන්තය ජයග්‍රහණය කළහොත් ඔවුන්ගේ දළ ලකුණු ලබාගැනීමේ වේගය සහ ඔස්ට්‍රේලියාවේ දළ ලකුණු ලබාගැනීමේ වේගය අනුව අවසන් පූර්ව වටයට සුදුසුකම් ලබනු ඇත.
කෙසේ වෙතත් ඔස්ට්‍රේලියාව හෝ නවසීලන්තය අද පැවැත්වීමට නියමිත තරගයෙන් පරාජයට පත් වුවහොත් ශ්‍රී ලංකාවට අවසන් පූර්ව වටයට සුදුසුකම් ලැබීමට අවස්ථාව හිමිවේ.
ඒ, හෙට එංගලන්තය සමග පැවැත්වෙන තරගය ශ්‍රී ලංකා කණ්ඩායම ජයග්‍රහණය කළහොත් පමණී.
