වික්ටෝරියා ප්‍රාන්තයේ අවුරුදු 15 ට අඩු ළමුන් සේවයට බඳවා ගන්නා ව්‍යාපාරික ආයතනවලින් සියයට 80 කට ඒ සඳහා අවශ්‍ය බලපත් නොමැති බව අනාවරණ වී තිබෙනවා.
වැටුප් පරීක්ෂණ ආයතනය මෑතකදී සිදුකල සමීක්ෂණයකදී හෙළිවී ඇත්තේ ඇතැම් සේවා යෝජකයන් ඒ පිළිබඳ නීතිය සම්බන්ධයෙන් පවා දැනුවත් නොමැති බවයි.
වික්ටෝරියා ප්‍රාන්තයේ පවතින කම්කරු නීතියට අනුව වයස අවුරුදු 11 න් ඉහළ ළමුන් පවා සේවයට යොදාගත හැකි නමුත් ඔවුන්ට පැවරිය හැකි වනුයේ ඩිලිවරි කාර්යයන් පමණයි.
අවුරුදු 13 ත් 15 ත් අතර ළමුන් රැකියාවට බඳවා ගන්නේ නම් ඒ සඳහා විශේෂිත අවසර පත්‍රයක් ලබාගත යුතු වනවා.
දැනට එක් එක් ළමයා වෙනුවෙන් වෙන වෙනම අවසර පත්‍ර ගත යුතු නමුත් ලබන ජූලි මාසයේ සිට තනි බලපත්‍රයක් ලබාගැනීම පමණක් ප්‍රමාණවත් වනු ඇති.
වික්ටෝරියා ප්‍රාන්තයේ කම්කරු නීතිවලට අනුව බාලවයස්කරුවන් අයථා ලෙස සේවයේ යොදවන ව්‍යාපාර ආයතනයකට ඩොලර් 18,000 ක – තනි පුද්ගල ව්‍යාපාරයක් පවත්වාගෙන යන අයෙකුට ඩොලර් 11,000 ක සහ බලපත් නොමැති රැකියා ස්ථානවලට දරුවන් රැකියා සඳහා යොමු කරන දෙමව්පියන්ට ඩොලර් 2,000 ක දඩයක් පැණවිය හැකියි.
