02 වන එළිසබෙත් රැජිණගේ අභාවය හමුවේ ෆෙඩරල් රජය විසින් හදිසියේම සිදුකල ලබන 22 වනදා ප්‍රසිද්ධ නිවාඩුවක් ලෙස ප්‍රකාශයට පත් කිරීම ගැටලු සහගත බව ඔස්ටේ්‍රලියාවේ සිල්ලර වෙළඳ ව්‍යාපාරික සම්මෙලනය පවසනවා.
වෙළඳසැල් විවෘත කර තබන වේලාවන් සහ සේවකයන්ට නිවාඩු ලබාදීම් සම්බන්ධයෙන් මෙතෙක් නිසි පැහැදිලි කිරීමක් ලැබී නොමැති බවයි ඔවුන් පෙන්වා දෙන්නේ.
එබැවින් ෆෙඩරල් රජය හෝ ප්‍රාන්ත රජයන් විසින් අදාළ නිවාඩු දිනයේ වෙළඳසැල් විවෘත කිරීම හෝ නොකිරීම ගැන නිල නිවේදනයක් නිකුත් කිරීමේ අවශ්‍යතාවයද සිල්ලර වෙළඳ ව්‍යාපාරික සම්මෙලනය අවධාරණය කරනවා.
මේ අතර නිවාඩු දිනයක් ප්‍රකාශයට පත් කිරීමට තමන් ගනු ලැබූ තීරණය කරුණු අධ්‍යයනය කර සියලු ප්‍රාන්ත අගමැතිවරුන් සමග සාකච්ඡා කර ගත් තීරණයක් බව අගමැති ඇන්තනී ඇල්බනීස් පවසනවා.
ඔස්ටේ්‍රලියාවේ රාජ්‍ය නායකයාගේ මරණය සහ නව රාජ්‍ය නායකයෙකු පත්වීම යන කරුණු සැළකිල්ලට ගෙන එම තීරණය ගත් බවයි අගමැතිවරයා සඳහන් කලේ.
