ජූනි මාසයෙන් අවසන්වූ වසරේ 02 වන කාර්තුවේදී ඔස්ටේ්‍රලියාවේ ආර්ථික වර්ධන වේගය සියයට 0.9 ක් ලෙස සටහන්වී තිබෙනවා.
සංඛ්‍යාලේඛණ කාර්යාංශය අද නිකුත් කල නවතම දත්ත වාර්තා අනුව දැක්වෙන්නේ ජූනි 30 වනදායින් අවසන්වූ මාස 12 ක කාලය තුළ මෙරට ආර්ථික වර්ධනය සියයට 3.6 ක් ලෙස සටහන්වී ඇති බවයි.
අඛණ්ඩව ආර්ථිකය වර්ධනය වූ 03 වන කාර්තුව මෙය වන අතර කොවිඩ් සමයේදී ඇද වැටුණු ඔස්ටේ්‍රලියා ආර්ථිකය නැවත ප්‍රකෘතිමත් වන ආකාරයක් එමගින් නිරූපණය වන බවත් එහි සඳහන්.
අවසන් කාර්තුවේ ඔස්ටේ්‍රලියා ආර්ථිකය ඉහළයාමට ප්‍රධාන වශයෙන් බලපා ඇත්තේ ගෘහාශ්‍රිත වියදම් කැපී පෙනෙන ලෙස ඉහළයාමයි.
ඊට අමතරව ප්‍රවාහන – සංචාර – හෝටල් සහ අවන්හල් සඳහා පුද්ගල වැය කිරීම් ඉහළයාමද ප්‍රබල පිටිවහලක් වී ඇති බවයි සංඛ්‍යාලේඛණ කාර්යාංශය සඳහන් කලේ.
කෙසේවෙතත් කොවිඩ් සමයේ සිදුකල වියදම් හා සැසඳීමේදී ඔස්ටේ‍රලියානුවන් තවමත් සිදුකරනු ලබන්නේ 2/3 ක වියදම් ප්‍රමාණයක් බවද අද නිකුත්කල දත්තවල දැක්වෙනවා.
