වික්ටෝරියා ගිලන් රථ සේවයේ ප්‍රමාදය හමුවේ පුද්ගල මරණ 33 ක් සිදුවීම සම්බන්ධයෙන් තමා අතිශය කණගාටුවට පත්වන බව ප්‍රාන්ත අගමැති ඩැනියල් ඇන්ඩෲස් පවසනවා.
අදාළ වින්දිත පවුල්වලින් තමා පුද්ගලිකවම සමාව අයැද සිටින බවයි අගමැතිවරයා සඳහන් කලේ.
වික්ටෝරියා ප්‍රාන්ත ගිලන් රථ සේවය හෙවත් 000 හි ප්‍රමාදයන් සහ අක්‍රමිකතා සම්බන්ධයෙන් වාර්තාවක් පසුගිය සෙනසුරාදා නිකුත්වුණා.
පසුගිය මාස කිහිපය තුළ ප්‍රාන්තය තුළ සිදුවූ මරණ 33 කට ප්‍රධානම හේතුව ගිලන් රථ ප්‍රමාදය බවටයි එමගින් චෝදනා කර තිබුණේ.
මෙම වාර්තාව නිකුත් කිරීමෙන් පසු ඩැනියල් ඇන්ඩෲස් විසින් ප්‍රසිද්ධියේ අදහස් දැක්වීමක් සිදුකල පළමු අවස්ථාවද මෙය වනවා.
කෙසේවෙතත් අදාළ කාල සීමාව තුළ සඳහා ලැබුණු ඇමතුම්වලින් සියයට 90 කට පමණ තත්පර 05 ක් ඇතුළත ප්‍රතිචාර දක්වා ඇති බවත් අගමැතිවරයා සඳහන් කර සිටියා.
