ශ්‍රී ලංකන් ගුවන් සේවයේ ව්‍යාපාරික පන්තිය තුල ආහාර නොමැති බවට ගුවන් මගියෙකු විසින් නිකුත් කළ වීඩියෝව සම්බන්ධයෙන් ගුවන් සමාගම විසින් පැහැදිළි කිරීමක් සිදුකර තිබෙනවා.
ඔවුන් මෙම ප්‍රකාශය තරයේ ප්‍රතික්ෂේප කරන අතර එය ගුවන් සමාගම සම්බන්ධයෙන් මහජනයා තුළ අප්‍රසාදයක් ඇතිකරලීම වෙනුවෙන් හිතාමතා කරුණු විකෘතිකර දැක්වීමක් බවයි ප්‍රකාශ කරන්නේ.
අදාළ ගුවන් යානයේදී ව්‍යාපාරික පන්තියේ ගුවන් මගීන් වෙනුවෙන් ප්‍රධාන ආහාර වේල් (කුකුළු මස්, සී ෆුඩ් සහ නිර්මාංශ) අතුරින් කැමති ආහාර වේලක් තෝරා ගැනීමේ අවකාශ සලසා තිබූ බවත් ගුවන් මගීන් සංඛ්‍යාව පදනම් කර ගනිමින් අවශ්‍ය ප්‍රමාණයට ආහාර ගුවන්යානය තුළ පැවති බවත් සමාගම සඳහන් කරනවා.
මෙම පුද්ගලයා නිකුත් කළ වීඩියෝවේ අඩංගු වන්නේ එක් ආහාර වර්ගයක් සෙසු ආහාර වර්ගවලට පෙර අවසාන වීමක් වන අතර එවිට ගුවන් සමාගම්වල සාමාන්‍ය පිළිවෙත වන්නේ ඒ වන විට ඉතිරිව පවතින ආහාර වර්ග අතුරින් එකක් තෝරා ගැනීමේ අවස්ථාව මගීන්ට පිරිනැනීමයි.
මෙම වීඩියෝව රූගත කළ තැනැත්තා රූගත කිරීම අතරතුර හිතාමතා හෝ වෙනයම් හේතුවක් මත ආහාර නොමැති බවට සිදු කළ ප්‍රකාශය මුළුමනින්ම සාවද්‍ය සහ නොමග යවන සුළු බව පැහැදිළි වන බවයි ශ්‍රී ලංකන් ගුවන් සමාගම පෙන්වා දෙන්නේ.
