ශ්‍රම හිගය පියවා ගැනීම සඳහා ඔස්ටේ්‍රලියාවේ ශ්‍රමිකයින්ට ස්ථිර වීසා ලබා ගැනීම සඳහා නව වැඩපිළිවෙලක් ආරම්භ කල යුතු බව අගමැති ඇන්තනී ඇල්බනීස් පවසනවා.
තාවකාලික සංක්‍රමණයට වඩා දිගු කාලීන හෝ ස්ථිර විකල්ප අවශ්‍ය බවයි ඔහු සඳහන් කලේ.
පුහුණු ශ්‍රමිකයින්ගේ හිගය සහ වීසා අයදුම්පත් ගොඩ ගැසී තිබීම පිළිබඳ ලේබර් පක්ෂ රජයේ මතය පැහැදිලි කරමිනුයි අගමැතිවරයා මේ බව කියාසිටියේ.
ස්ථිර වීසා ලාභීන් සංඛ්‍යාව වැඩි කෙරෙන ක්‍රමයකට යා යුතුව ඇතැයිද ඇන්තනී ඇල්බනීස් කියාසිටියා.
එළඹෙන සැප්තැම්බර් මාසයේ පාර්ලිමේන්තු පරිශ්‍රයේ පැවැත්වීමට නියමිත රැකියා සමුළුවක් නිවේදනය කරමින් අගමැති ඇල්බනීස් මෙම අදහස් පළ කලා.
ව්‍යාපාර, වෘත්තීය සමිති, සිවිල් සමාජ කණ්ඩායම් සහ රජයේ අනෙකුත් සංවිධාන මේ සඳහා එක් කරගැනීමට රජය අදහස් කරන බවද අගමැතිවරයා කියාසිටියා.
