දකුණු අප්‍රිකාවේ බස් රථ අනතුරකින් පුද්ගලයන් 45 දෙනෙකු මියගොස් 8 හැවිරිදි කුඩා දැරියක් පමණක් දිවි ගලවා ගෙන තිබෙනවා.
ඔවුන් ගමන් ගත් බස් රථය ඊසානදිග ලිම්පෝපෝ (Limpopo) ප්‍රදේශයේදී පාලමකින් පෙරලී අඩි 165ක් පමණ පහළින් පිහිටි මිටියාවතකට වැටීමෙන් අනතුර සිදු වී ඇති බවයි විදෙස් මාධ්‍ය වාර්තා කළේ.
අනතුරින් දිවි ගලවා ගත් එකම පුද්ගලයා වූ අට හැවිරිදි දැරිය තුවාල ලබා රෝහල් ගත කර තිබෙනවා.
එහි ගමන් කර ඇත්තේ ගැබොරෝන් සිට මොරියා නගරයේ පාස්කු දේව මෙහෙයක් සඳහා ගිය බැතිමතුන් පිරිසක්.
දකුණු අප්‍රිකානු මාධ්‍ය වාර්තා කළේ බස් රථය රියදුරාට පාලනය කර ගැනීමට නොහැකිව කඳුකරයේ පාලමකින් ඉවතට පැන ප්‍රපාතයට වැටී ගිනිගෙන ඇති බවයි.
ගලවා ගැනීමේ මෙහෙයුම් බ්‍රහස්පතින්දා සවස් වන තෙක් ක්‍රියාත්මක වූ අතර සුන්බුන් අතරට ළඟා වීමට අපහසු බව ද වාර්තා වනවා.
සිද්ධිය වූ ස්ථානයට ගිය දකුණු අප්‍රිකා ප්‍රවාහන අමාත්‍යවරයා මෙම ඛේදජනක බස් රථ අනතුරෙන් විපතට පත් පවුල්වලට සිය ශෝකය පළ කර තිබෙනවා.
ඇය තවදුරටත් සඳහන් කළේ මෙම පාස්කු සති අන්තයේ වැඩි පිරිසක් මාර්ගවල සිටින බැවින් සෑම විටම වගකීමෙන් රිය පැදවිය යුතු බවයි.
