ඔස්ට්‍රේලියානු සුපිරි වෙළඳසැල් තුළ ජනප්‍රියම තේ සන්නාමයක් වන ශ්‍රී ලාංකික නිෂ්පාදනයක් වන ඩිල්මා තේ, Coles සහ Woolworths යන සුපිරි වෙළඳසැල් ජාල සමග ව්‍යාපාර කටයුතු සිදුකිරීමෙන් ඉවත්වීම කෙරෙහි අවධානය යොමු කර තිබෙනවා.
එහි විධායක නිළධාරී ඩිල්හාන් ප්‍රනාන්දු සඳහන් කලේ අදාළ සුපිරි වෙළඳසැල් ජාල විසින් ඉහළ වට්ටම් ඉල්ලා සිටීම සහ සිය නිෂ්පාදන සඳහා වන නියමිත මුදල් ගෙවීම පැහැර හරිමින් සිටීම ඊට හේතුව බවයි.
මේ සම්බන්ධයෙන් කිසියම් එකගතාවයකට පැමිණීමට නොහැකි වුවහොත් ඔස්ට්‍රේලියානු සුපිරි වෙළඳසැල් වෙත සිය නිෂ්පාදන සැපයීම නතර කරන බවටද ඩිල්මා සමාගම අනතුරු අගවා සිටිනවා.
ලොව 10 වන විශාලම තේ සන්නාමය වන ඩිල්මා සමාගම දීර්ඝ කාලයක සිට ඔස්ට්‍රේලියාව තුළ ව්‍යාපාර කටයුතු සිදුකරමින් සිටින නමුත් 2009 වසරේ සිට මේ දක්වා ලාභ ලබා නොමැති බවයි පැවසෙන්නේ.
එමෙන්ම පසුගිය වසර 05 සැළකීමේදී ඔවුන්ගේ විකිණුම් ද ඩොලර් මිලියන 37 සිට ඩොලර් මිලියන 29 දක්වා පහත වැටී තිබෙනවා.
ඔස්ට්‍රේලියානු සුපිරි වෙළඳසැල් ක්‍රියාත්මක කරන අසාධාරණ වෙළඳ ප්‍රතිපත්ති මීට හේතුව බවටයි ඩිල්මා සමාගමේ විධායක නිළධාරී ඩිල්හාන් ප්‍රනාන්දු චෝදනා කරන්නේ.
දැනට ලොව පුරා රටවල් 104 ක ඩිල්මා තේ නිෂ්පාදන අලෙවි කෙරෙන අතර ඔස්ට්‍රේලියාව තුළදී ඔවුන් සිය නිෂ්පාදන අලෙවිය ආර්මභ කරනු ලැබුවේ 1988 වසරේදී Coles සමග ඇතිකරගත් එකගතාවයක් අනුවයි.
