02 වන එළිසබෙත් රැජිණ අභාවප්‍රාප්ත වූවද ඇයගේ රුව ඇතුළත්ව රටවල් ගණනාවක භාවිත කෙරෙන මුදල් නෝට්ටු සහ කාසි තවත් දීර්ඝ කාලයක් පුරා සංසරණය වනු ඇති බවට මත පළවනවා.
එමෙන්ම ඒවා තවදුරටත් වලංගු බැවින් ජනතාවට භාවිත කිරීමේදී කිසිදු ගැටලුවක් පැණ නොනගින බවයි එක් එක් රටවල මහ බැංකු සහ සංචිත බැංකු අවධාරණය කරන්නේ.
බ්‍රිතාන්‍යය – කැනඩාව – නවසීලන්තය සහ ඔස්ටේ‍රලියාව ඇතුලු රටවල් ගණනාවක භාවිත කෙරෙන මුදල් නෝට්ටුවල සහ කාසිවල රැජිණගේ රුව අන්තර්ගත වනවා.
ඉදිරියේදී චාර්ල්ස් රජුගේ රුව ඇතුළත් නෝට්ටු සහ කාසිද සංසරණයට එක් කෙරෙන බැවින් එළිසබෙත් රැජිණ සහ චාර්ල්ස් රජු යන දෙදෙනාගේම රුව ඇතුළත් කාසි සහ නෝට්ටු භාවිත වනු දැකගත හැකියි.
මහා බ්‍රිතාන්‍යය තුළ දැනට භාවිත වන නෝට්ටු බිලියන 4.7 ක සහ කාසි බිලියන 29 ක රැජිණගේ රුව අන්තර්ගත වන බැවින් ඒවා මුලුමනින්ම භාවිතයෙන් ඉවත්වීමට නම් තවත් වසර ගණනාවක් ගතවිය හැකි බවයි ආර්ථික විද්වතුන් පෙන්වා දෙන්නේ.
