ශ්රී ලංකා වාණිජ බැංකු කිහිපයක් ණය කාඩ්පත් සඳහා අයකරනු ලබන පොලී අනුපාතිකය ඉහළ දමා ඇති බව වාර්තා වෙයි.
ශ්රී ලංකා මහ බැංකුවේ මුදල් මණ්ඩලය අප්රේල් 8 වැනිදා ණය කාඩ්පත් සඳහා පනවා තිබූ උපරිම පොලී අනුපාතික සීමා ඉවත් කිරීමට තීරණය කළේය.
එම තීරණයෙන් පසු එතෙක් සියයට 18 ක්ව පැවති ණය කාඩ්පත් පොලිය අද වන විට සියයට 30 ක් දක්වා ඉහළ ගොස් ඇතැයි පැවැසෙයි.
එක් වාණිජ බැංකුවක් පමණක් ණය කාඩ්පත් පොලිය ජූලි මස සිට තවත් සියයට 6 කින් වැඩි කරමින් සියයට 36 සීමාවට රැගෙන විත් ඇතැයි ආරංචි මාර්ග ප්රකාශ කළේය.
මේ අතර ශ්රී ලංකා මහ බැංකුවේ නවතම වාර්තා වලට අනුව මෙම වසරේ අප්රේල් මාසය වන විට සක්රීයව පවතින ණය කාඩ්පත් ප්රමාණය 1,973,481 ක් වන අතර මෙම ණය කාඩ්පත් වෙනුවෙන් අප්රේල් මාසය අවසන් වන විට ගෙවිය යුතු මුළු හිඟ මුදල් ප්රමාණය රුපියල් මිලියන 138,192 කි.