Day: April 4, 2021

ගෑස් කාන්දුවක් හේතුවෙන් සිඩ්නි ඔපෙරා ශාලාව අවටින් පුද්ගලයන් ඉවත් කර තිබෙනවා. අද පස්වරු 03 ට පමණ එම ස්ථානයට ගිනි නිවීම් කණ්ඩායම් කැඳවීමට සිදුවූ බවයි වාර්තා වන්නේ. කෙසේවෙතත් මෙමගින් ඔපෙරා ශාලාවට කිසිදු බලපෑමක් නොමැති බවද ඉතා කුඩා ස්ථානයක ගෑස් කාන්දුව සිදුවී ඇති බවද සඳහන්. පාස්කු නිවාඩුවත් සමග මේ දිනවල සිඩ්නි ඔපෙරා ශාලාව අසල විශාල පිරිසක් නිරතුරුව සිටිනු දක්නට හැකියි.

සතුන් සඳහා වන ලොව පළමු කොවිඩ් එන්නත නිපදවීමට රුසියාව පියවර ගෙන තිබේ. ඊට රුසියාවේ රාජ්‍ය පශු වෛද්‍ය සේවයේ අනුමැතිය හිමිවිය. ලොව පුරා විවිධ සත්ත්ව විශේෂවලට කොවිඩ් ආසාදනය වීමේ සිදුවීම් වාර්තා වී තිබේ. කෙසේ වෙතත් පර්යේෂකයින් පවසන්නේ මිනිසුන්ට රෝගය පැතිරවීමට සතුන් සැලකිය යුතු කාර්යභාරයක් ඉටුකරන බවට දැනට කිසිදු සාක්ෂියක් නොමැති බවය. කෙසේ වෙතත් වෛරසයට නිරාවරණය වීමට වැඩි අවධානමක් තිබීම හේතුවෙන් ඩෙන්මාර්කය ගොවිපොළ රැසක සිටින මින්ක් නම් මුගටි විශේෂයට අයත් මිලියන 17ක් මරා දැමීම දැඩි මතභේදයට තුඩුදුන්නේය.

ආසියානු සම්භවයක් සහිත පුද්ගලයන් දෙදෙනෙකුට වර්ගවාදී අයුරින් හඳුන්වන ලද බ්‍රිස්බන් නුවර අවන්හලකට දැඩි දෝෂාරෝපණ එල්ල වී තිබෙනවා. අදාළ පාරිභෝගිකයන් දෙදෙනා විසින් ඇණවුම් කරන ලද ආහාර වට්ටෝරුවේ ඇණවුම් පතේ “two very annoying Asians” ලෙසින් සටහන් කර තිබීම ඊට හේතුවයි. කෙසේවෙතත් මෙම සිදුවීම සම්බන්ධයෙන් මේ වනවිට අදාළ අවන්හලේ පාලනාධිකාරිය විසින් විමර්ශනයක් ආරම්භ කර තිබේ. සිද්ධිය පිළබිඳ සමාව අයැද සිටින බවයි ඔවුන් නිකුත් කර ඇති නිවේදනයක සඳහන් වන්නේ.

ගිණිකොණ දිග මෙල්බර්න් හිදී සැහැල්ලු ගුවන් යානයක් අනතුරට ලක්වීමෙන් පුද්ගලයෙකු මියගොස් තිබෙනවා. Koo Wee Rup ප්‍රදේශයේදී සිදුවූ මෙම අනතුරින් මියගොස් ඇත්තේ යානයේ නියමුවා බවට මේ වනවිට තහවුරු අවසන්. weight-shift microlight වර්ගයේ සැහැල්ලු යානයක් මෙලෙස අනතුරට ලක්වී තිබෙනවා.