තමන් COVID-19 එන්නත ලබා නොගන්නා බව ඔස්ට්‍රේලියාවේ වැඩිහිටි පිරිසෙන් තුනෙන් එකක් පමණ පවසනවා.
අදාළ මත විමසුමේදී කොරෝනා එන්නතේ අතුරු ආබාධ පිළිබඳ ඔස්ට්‍රේලියානු ජනතාව තුළ සැක සංකා ඇති බව සොයාගෙන තිබෙනවා.
ඔස්ට්‍රේලියාවේ දේශ සීමා වසා දමා තිබියදීත්, මෙම කොරෝනා එන්නත ලබා ගැනීමට ඉක්මන් නොවිය යුතු බවට බොහෝ දෙනා සිතන බවද එහිදී හෙළිවී තිබෙනවා.
කොරෝනා එන්නත ලබාගැනීම සඳහා ඕස්ට්‍රේලියානුවාසීන්ව උනන්දු කරවීමට ප්‍රචාරණ වැඩසටහන් ආරම්භ කළ යුතු කාලය දැන් එළඹ ඇති බව සිඩ්නි විශ්ව විද්‍යාලයේ එන්නත් පිළිබඳ විශේෂඥ මහාචාර්ය Julie Leask පවසනවා.
කොරෝනා එන්නත් ලබාගැනීම පිළිබඳ මෙම නව මත විමසුමේ ප්‍රතිඵල වැදගත් කොට නොසලකන බව ඔස්ට්‍රේලියානු අග්‍රාමත්‍ය Scott Morrison ප්‍රකාශ කර තිබෙනවා.
මේ වසර අග භාගය වන විට සෑම ඔස්ට්‍රේලියානුවාසියෙකුටම ප්‍රමාණවත් තරම් Pfizer සහ Moderna වැනි mRNA වර්ගයේ කොරෝනා එන්නත් ලබා දීමට සැපයුම වැඩි කර ඇති බව ද සෞඛ්‍ය අමාත්‍ය Greg Hunt ප්‍රකාශ කළා.
