මෙල්බර්න් ගුවන් තොටුපළේදී පරෙවි බිත්තර සමඟ අත්අඩංගුවට ගත් සංචාරකයෙකුට දඩ මුදල් නියම කර තිබෙනවා.
ගමන් මලුවල පරෙවි බිත්තර 23ක් රැගෙන ඔස්ට්‍රේලියාවට ඇතුළු වීමට උත්සාහ කළ පුද්ගලයකු අත්අඩංගුවට ගත් ඔස්ට්‍රේලියානු දේශසීමා බළකාය විසිනුයි සැකකරුට ඩොලර් 6000කට අධික දඩයක් නියම කර ඇත්තේ.
පසුගිය පළමුවනදා මෙල්බර්න් ජාත්‍යන්තර ගුවන් තොටුපළට පැමිණි අවස්ථාවේදී නිලධාරීන් ඔහුගෙන් කළ ප්‍රශ්න කිරීම්වලින් අනතුරුව මෙම සොයා ගැනීම සිදු කර තිබුණා.
නිලධාරීන් සැකකරුගේ ගමන් මලු පරීක්ෂාවක් සිදු කළ අතර එහිදී කපු සහ ඇලුමිනියම් තීරුවලින් ඔතා තිබූ ලෝහ පෙට්ටියක තිබී පරවි බිත්තර සොයා ගෙන තිබෙනවා.
එමෙන්ම සංචාරකයාගේ ගමන් මලුවල මුද්‍රා තැබූ විවිධ කුඩා මලුවල සූරියකාන්ත බීජ අතර සඟවා තිබූ දුම්කොළ ග්‍රෑම් 9750ක් ද නිලධාරීන් විසින් සොයා ගෙන ඇතැයි සඳහන්.
පරෙවි බිත්තර ජෛව ආරක්ෂණ නිලධාරීන් වෙත යොමු කරන ලද අතර කෘෂිකර්ම, ධීවර හා වන විද්‍යා දෙපාර්තමේන්තුව විසින් සැකකාර සංචාරකයාට ඩොලර් 6260 ක දඩයක් නියම කළ බව සඳහන්.
