සිඩ්නි උතුරු බොන්ඩායි ප්රදේශයේ මහල් නිවාසයක තිබී 19 හැවිරිදි තරුණියකගේ මළ සිරුරක් පොලිසිය විසින් සොයාගෙන තිබෙනවා.
අද උදෑසන 9.20ට පමණ ලැබුණු තොරතුරකට අනුව මෙම සිරුර සොයාගෙන ඇති බවයි වාර්තා වන්නේ.
ගිලන් රථ වෛද්යවරුන් සහ පොලිස් නිලධාරීන් පැමිණෙන විටත් මෙම තරුණිය මියගොස් සිටි බව සඳහන්.
මියගිය තරුණියගේ අනන්යතාව මෙතෙක් නිල වශයෙන් හඳුනාගෙන නොමැති නමුත් ඇයගේ වයස අවුරුදු 19ක් බවට විශ්වාස කෙරෙනවා.
32 හැවිරිදි පුද්ගලයෙකු මෙම නිවසේ සිටියදී සැකපිට අත්අඩංගුවට ගෙන ඇති අතර මෙතෙක් ඔහුට කිසිදු චෝදනාවක් එල්ලවී නැහැ.
පොලිස් ආරංචි මාර්ග පවසන්නේ මෙම යුවළ ප්රේම සම්බන්ධයක් පවත්වාගෙන ගිය අතර පසුගිය වසරේ සිට එම නිවසේ එකට ජීවත් වූ බවයි.
කාන්තාවගේ මරණයට හේතුව තීරණය කිරීම සඳහා පශ්චාත් මරණ පරීක්ෂණයක් පැවැත්වීමට නියමිතයි.