ලිතුවේනියාවේ බර වාහන රියදුරන් ලෙස සේවය කිරීමට ගිය ශ්‍රී ලාංකිකයන් 106 දෙනෙකු යුරෝපයේ අතරමංවී සිටින බවට අනාවරණ වී තිබෙනවා.
ඔවුන් බලාපොරොත්තු වූ රැකියා, ආහාර පාන හෝ නවාතැන් පහසුකම් නොමැති වීම හේතුවෙන් මෙම ශ්‍රී ලාංකිකයන් අතරමං ව ඇති බවයි වාර්තා වන්නේ.
මෙම කරුණු අනාවරණ වී ඇත්තේ අදාළ කණ්ඩායමේ සිට ලිතුවේනියාවෙන් පිටුවහල් කරන ලද දෙදෙනෙකු නැවත ශ්‍රී ලංකාවට පැමිණ කළ කරුණු දැක්වීමෙන් පසුවයි.
එම දෙදෙනා ඇතුලු ශ්‍රී ලාංකිකයන් 108 දෙනෙකු විදේශ සේවා නියුක්ති කාර්යාංශයේ ලියාපදිංචි වී රුපියල් ලක්ෂ 12ක් ගෙවා කොළඹ රැකියා නියෝජිත ආයතනයක් මගින් ලිතුවේනියාවේ බර වාහන රියදුරන් ලෙස පිටත්ව ගොස් තිබුණා.
ලිතුවේනියාවට ගිය පසු එරට සමාගමක් විසින් ශ්‍රී ලාංකිකයන් දෙදෙනෙකුට පමණක් බර වාහන රියදුරු තනතුරු ලබා දී අනෙක් පිරිස ඌරු කොටුවල රැකියා සඳහා යොමු කර ඇතැයිද සඳහන්.
පසුව අදාළ රියදුරන් ඊට අකමැත්ත ප්‍රකාශ කිරීමෙන් පසු ලිතුවේනියානු රජය විසින් වසර දෙකක් සඳහා ලබා දී තිබූ නේවාසික වීසා බලපත්‍රය අහෝසි කර ඇති බවයි වාර්තා වන්නේ.
මේ පිළිබඳ ඔවුන් ශ්‍රී ලංකා මානව හිමිකම් සංවිධානයේ සභාපතිවරයා දැනුවත් කිරීමෙන් පසු නැවත ශ්‍රී ලංකාවට ගෙන්වාගැනීමට කටයුතු කර තිබෙනවා.
