දෙවන ලෝක යුද සමයේදී සහ අනෙකුත් යුද ගැටුම්වලදී මියගිය ඔස්ට්‍රේලියා සහ නවසීලන්ත රණවිරුවන් සමරන ඇන්සක් (ANZAC) දිනය අදට යෙදී තිබෙනවා.
ඒ වෙනුවෙන් සියලුම ප්‍රාන්ත අගනුවරවලදී සැමරුම් පෙළපාලි ඇතුලු විවිධ වැඩසටහන් සංවිධාන කර ඇති බවයි වාර්තා වන්නේ.
සති අන්ත නොවන දිනයකදී මෙවර ANZAC දිනය යෙදී ඇති බැවින් සියලුම ප්‍රාන්තවල අද ප්‍රසිද්ධ නිවාඩු දිනයක් ලෙස ප්‍රකාශයට පත් කර තිබෙනවා.
අද දිනයේදී වික්ටෝරියා ප්‍රාන්තයේ බොහෝ සිල්ලර වෙළඳ සැල් සහ ව්‍යාපාරික ස්ථාන පස්වරු 01 දක්වා විවෘතව තැබෙනු ඇති.
එහෙත් ඔසුසැල්, ඉන්ධන පිරවුම්හල්, අවන්හල් වැනි ස්ථාන නියමිත වේලාවන් තුළ විවෘතව තැබෙනු ඇති.
කිසියම් ආකාරයකින් ANZAC දිනය සති අන්තයේ දිනයක යෙදී තිබුණේ නම් නොර්තන් ටෙරිටරි, ක්වීන්ස්ලන්ඩ්, දකුණු ඔස්ට්‍රේලියා සහ බටහිර ඔස්ට්‍රේලියාවේ ඊට පසුව එළඹෙන සඳුදා දිනයේදී එම නිවාඩුව ලබාදීම සිදුවනවා.
