දියතලාව ෆොක්ස් හිල් සුපර්ක්‍රොස් ධාවන තරගයේදී සිදු වූ අනතුරට අදාළව රියදුරන් දෙදෙනෙකු පොලිසිය විසින් අත්අඩංගුවට ගෙන තිබෙනවා.
අනතුර සම්බන්ධයෙන් සිදු කෙරෙන විමර්ශනවල කොටසක් ලෙස දැනට රෝහල්ගතව ප්‍රතිකාර ලබන රියදුරන් දෙදෙනා අත්අඩංගුවට ගත් බවයි පොලිසිය සඳහන් කළේ.
අනතුරේ බරපතලකම හමුවේ මෝටර් රථ ක්‍රීඩා ඉසව්වල ආරක්‍ෂිත පියවර පිළිබඳ අවධානයට ලක්වී ඇති අතර එම ඉසව්වේ ආරක්‍ෂිත ක්‍රමවේද සහ කළමනාකරණය පිළිබඳ විමර්ශනයක් සිදු කිරීමට ද නියමිතයි.
ෆොක්ස් හිල් සුපර් ක්‍රොස් ධාවන තරගයේදී මෝටර් රථයක් ධාවන පථයෙන් ඉවතට පැන ඊයේ සිදු වූ අනතුරින් පුද්ගලයන් 7 දෙනෙකු ජිවිතක්ෂයට පත්වී තවත් 21 දෙනෙකු තුවාල ලබා රෝහල් ගත කර තිබෙනවා.
පොලිසිය සඳහන් කළේ ඊයේ පැවති මෝටර් රථ ධාවන තරඟයක් අතරතුර සිදුවූ මෙම අනතුරින් මියගිය පිරිස අතර 8 හැවිරිදි කුඩා දැරියක් ද සිටින බවයි.
මෙම අනතුරත් සමග තරගයේ ඉතිරි සියලු තරග අවලංගු කිරීමටයි සංවිධායකයින් පියවර ගෙන ඇත්තේ.
ධාවනය වෙමින් තිබූ මෝටර් රථයක් අනතුරට ලක්වී ඇති අතර එය නැරඹීමට ඉදිරියට පැමිණි පිරිසක් තවත් මෝටර් රථයක ගැටී මෙම අනතුර සිදුවී ඇති බවයි පොලිසිය සඳහන් කරන්නේ.
අවසන් වරට 2019 වසරේ අප්‍රේල් 21 වනදා ෆොක්ස් හිල් ධාවන තරගාවලිය පැවැත්වූ අතර පාස්කු ඉරිදා ත්‍රස්ත ප්‍රහාරය හේතුවෙන් එම තරගය අතරමග නතර කිරීමට සිදු වී තිබුණා.
ඒ අනුව වසර 5ක කාලයක් තරගාවලිය නොපැවැත්වුණු අතර පාස්කු ප්‍රහාරයට වසර 5ක් ගත වූ ඊයේ දිනයේ තරගය පවත්වන අවස්ථාවේ මෙම අනතුර සිදුවී තිබෙනවා.
මෙවර එම තරගාවලිය නැරඹීම සඳහා විශාල ජනතාවක් ද එක්ව සිටි බව ද සඳහන්.
