ඉන්දියාවේ පූනේ නගරයේ මිනිසුන් බිය ගන්වන සුළු අසාමාන්‍ය මදුරු ගහනයක් පූනේ අහසේ සැරසරන ආකරය දැක්වෙන වීඩියෝවක් ඊයේ (12දා) දවස පුරා ලොව පුරා පැතිර ගියා.
සුළි කුණාටුවක් ලෙසින් දිස් වූ මෙම අසාමාන්‍ය දසුන බොහෝ දෙනෙකු හැඳින් වූයේ ‘මදුරු ටෝනාඩෝ එකක් ලෙසින්.
පූනේහි කේෂව්නගර් සහ ඛාරාඩි ගව්තාන් ප්‍රදේශවල අහසේ මෙම මදුරු සුළි කුණාටුව සැරසරා ඇත.
ඉන්දීය පරිසරවේදීන් පවසන්නේ, පූනේ නගරය හරහා ගලායන මූතා ගඟේ ජල මට්ටම ඉහළ යාම හේතුවෙන් මෙම අසාමාන්‍ය සංසිද්ධිය ඇතිවන්නට ඇති බවයි.
කෙසේ වෙතත් මෙම තත්ත්වය නිසා ප්‍රදේශවාසීන් දැඩි භීතියට පත්ව සිටියි.
මෙම මදුරු උවදුර නිසා තමන් ගැටලු රැසකට මුහුණදී සිටින බවට ඔවුන් සෞඛ්‍ය අංශයන්ට චෝදනා කරයි.
විශේෂයෙන් මෙම ප්‍රදේශයේ පූනේහි ධනවතුන් ජීවත්වන මහල් සංකීර්ණ කිහිපයක්ද පිහිටා තිබෙන අතර, ඔවුන්ට සිය සුඛෝපභෝගී නිවසේ බැල්කනියේ දොරවල් පවා විවෘත කිරීමට නොහැකි වි තිබෙනවා.
කේෂව්නගර් සහ ඛාරාඩි ගව්තාන් ප්‍රදේශවල සෑම උද්‍යානයක්ම ළමයින්ට තහනම් කර ඇති අතර, ප්‍රදේශවාසින්ට හැකිතරම් නිවෙස්වලටම වි සිටිනැයි උපදෙස් ලබා දී ඇත.
කෙසේ වෙතත් නගරවැසියන් කිහිප දෙනෙකු සමාජ මාධ්‍ය ඔස්සේ තම ගැටළු පිළිබඳව ප්‍රකාශ කරමින් බලධාරීන්ගෙන් ඉල්ලා සිටියේ, මෙම තත්ත්වයට පියවර ගෙන හානියට පත් ප්‍රදේශය පිරිසිදු කරන ලෙසයි.
