නවසීලන්ත ජාතිකයන් සඳහා ඔස්ට්‍රේලියාවේ පුරවැසිභාවය ලබාදීමේ කඩිනම් වැඩපිළිවෙල යටතේ සති 06 ක් තුළදී 15,000 කට වැඩි පිරිසක් ඒ සඳහා අයදුම් කර තිබෙනවා.
පසුගිය ජූලි 01 වනදා සිට මෙම නව ක්‍රමවේදය ක්‍රියාත්මක කෙරුණු අතර ඒ අනුව එක් දිනකට 375 කට ආසන්න පිරිසක් එලෙස අයදුම්පත් යොමු කර ඇති බවයි පැවසෙන්නේ.
මෙම අයදුම්පත් අතුරින් සියයට 35 ක් පමණ ක්වීන්ස්ලන්ඩ් ප්‍රාන්තයෙන් වන අතර වික්ටෝරියාවෙන් සියයට 30 ක් සහ නිවු සවුත් වේල්ස් ප්‍රාන්තයෙන් සියයට 20 ක් පමණ අයදුම්පත් ලැබී තිබුණා.
මෙම පිරිස අතුරින් 500 කට ආසන්න පිරිසක් දැනටමත් පුරවැසිභාව පරීක්ෂණයද සමත්වී ඇති අතර ඉදිරියේදී උත්සවාකාරයෙන් ඔවුන්ට මෙරට පුරවැසිභාවය පිරිනැමීමට නියමිතයි.
විශේෂ වීසා කාණ්ඩය යටතේ අවම වශයෙන් වසර 04 ක් ඔස්ට්‍රේලියාවේ රැඳී සිට ඇති නවසීලන්ත ජාතිකයන්ට ස්ථිර පදිංචියෙන් තොරවම පුරවැසිභාවය ලබාදීම මේ යටතේ සිදුවනවා.
දැනට විශේෂ වීසා කාණ්ඩය යටතේ ඔස්ට්‍රේලියාව තුළ සිටින නවසීලන්ත ජාතිකයන් 350,000 කට පමණ ස්ථිර පදිංචිය ලබාගැනීමෙන් තොරව සෘජුවම පුරවැසිභාවය ලබාගැනීමට අවස්ථාව හිමිවනු ඇති.
