මගීන් ගුවන් යානයට පිවිසීම (boarding) කඩිනම් කිරීම සඳහා ක්වන්ටාස් ගුවන් සේවය විසින් අද සිට නව නියමු වැඩසටහනක් අත්හදා බැලීම ආරම්භ කර තිබෙනවා.
ඒ අනුව බහුතර ගුවන් යානා සංඛ්‍යාවක ඉදිරිපස පිවිසුම් දොරටුවට අමතරව පිටුපස ඇති දොරටුවෙන්ද මගීන්ට යානයට ඇතුලුවීමට අවස්ථාව හිමිවනු ඇති.
ගුවන් යානයේ පසුපස ආසනවල සිටින මගීන්ට පළමුවෙන් යානයට ඇතුලුවීමට අවසර දීම සාමාන්‍ය ක්‍රමවේදයයි.
කෙසේවෙතත් මැද කොටසේ සිටින මගීන් පළමුවෙන් අසුන් ගන්වා අනතුරුව ඉදිරිපස ආසනවල සිටින මගින් ඉදිරිපස දොරටුවෙන්ද පසුපස ආසනවල සිටින මගීන් පසුපස දොරටුවෙන්ද ගුවන් යානයට ඇතුලු කර ගැනීමටයි ක්වන්ටාස් ගුවන් සේවය තීරණය කර ඇත්තේ.
සති 02 කට ආසන්න කාලයක් බ්‍රිස්බන් ගුවන් තොටුපළේදී මෙම අත්හදා බැලීම ක්‍රියාත්මක කෙරෙන අතර අනතුරුව ලබන ඔක්තෝබර් සිට සමස්ත රට පුරා එය ක්‍රියාත්මක කිරීම ආරම්භ කිරීමට නියමිතයි.
මේ හරහා ගුවන් ගමන් ප්‍රමාදය අවම කරගැනීමටත් මගීන්ට යානයට පිවිසීම සඳහා රැඳී සිටීමට සිදුවන කාලය අවම වනු ඇති බවත් ක්වන්ටාස් ගුවන් සමාගම සඳහන් කර සිටිනවා.
