කොවිඩ් දඩ නියම කිරීමේදී වර්ගවාදී අයුරින් කටයුතු කල බවට එල්ල වන චෝදනා වික්ටෝරියා ප්‍රාන්ත පොලිසිය ප්‍රතික්ෂේප කරනවා.
ප්‍රාන්ත ප්‍රධාන සෞඛ්‍ය නිළධාරී විසින් දුන් නියෝග අනුව 2020-2021 කාලසීමාවේදී කොවිඩ් රෙගුලාසි කඩකල බවට නිරීක්ෂණය වූ සියල්ලන්ට එරෙහිව නීතිය ක්‍රියාත්මක කල බවයි ඔවුන් අවධාරණය කරන්නේ.
තමාට එරෙහි දඩය අසාධාරණ යැයි හැගී යන ඕනෑම අයෙකුට Fines Victoria හරහා අභියාචනයක් ගොණු කිරීමේ හැකියාව පවතින බවද වික්ටෝරියා ප්‍රාන්ත පොලිසිය දන්වා සිටිනවා.
කොවිඩ් වසංගත සමයේ දඩ නියම කිරීමේදී අප්‍රිකානු සහ මැද පෙරදිග පෙනුමක් ඇති පුද්ගලයන්ට සෙසු ප්‍රජාවන්ට වඩා 04 ගුණයක් වැඩියෙන් දඩ පත්‍රිකා නිකුත් කර ඇති බවයි ස්වාධීන ආයතනයක් ඊයේ අනාවරණය කලේ.
වික්ටෝරියා හි ඇතැම් ප්‍රදේශවල සුදු සමක් සහිත ඔස්ටේ්‍රලියානුවන්ගේ ප්‍රතිශතය ඉහළ අගයක පැවතියද ඔවුන්ට දඩ නියම කිරීම් සිදුවී ඇත්තේ ඉතා අවම ප්‍රතිශතයකින් වීම ගැටලූ සහගත බවයි ඔවුන් අවධාරණය කර තිබුණේ.
කොවිඩ් වසංගතය දරුණුතම අවධිය පැවති 2020 වසරේදී වික්ටෝරියා ප්‍රාන්ත පොලිසිය විසින් දඩ පත්‍රිකා 37,405 ක් නිකුත් කර තිබුණා.
ඉන් සියයට 20 කට වැඩි ප්‍රමාණයක් නිකුත් කර ඇත්තේ අප්‍රිකානු සහ මැද පෙරදිග පෙනුමක් ඇති පුද්ගලයන්ටයි.
කෙසේවෙතත් ජනගහණය ඔවුන්ගේ ප්‍රතිශතය සටහන් වන්නේ සියයට 05 ක් ලෙසයි.
