දෙවන එලිසබෙත් මහ රැජිනගේ අවසන් කටයුතු සැප්තැම්බර් 19 සඳුදා ලන්ඩනයේ වෙස්ට්මිනිස්ටර් ඇබේ හිදී පැවැත්වීමට නියමිත බව බකිංහැම් මාලිගය තහවුරු කර තිබෙනවා.
දේහය ලබන අඟහරුවාදා ලන්ඩනයට ගෙන යාමට පෙර ඉරිදා බැල්මොරල් මාලිගයේ සිට එඩින්බරෝ වෙත ගෙන යනු ඇති.
පසුව බදාදා සිට ලන්ඩනයේ වෙස්ට්මිනිස්ටර් ඇබේ හි පැවැත්වෙන අවමංගල්‍ය උත්සවයේ උදෑසන දක්වා වෙස්ට්මිනිස්ටර් ශාලාවේ දේහය තැන්පත් කර තැබීමට නියමිතයි.
මේ අතර මහ රැජිනගේ දේහය ස්කොට්ලන්තයේ රාජකීය නිවස වන හෝලිරූඩ් හවුස් වෙත රැගෙන යාමට නියමිත බවද සඳහන්.
ස්කොට්ලන්තයේ එඩින්බරෝහි හෝලිරූඩ් හවුස් හිදී මහ රැජිනට ගෞරව දැක්වීමට රාජකීයයන්ට අවස්ථාව හිමිවනවා.
ඉන් අනතුරුව ඇයගේ දේහය ශාන්ත ගයිල් දේවස්ථානයට රැගෙන යන අතර, පසුව රාජකීය දුම්රිය මගින් හෝ විශේෂිත ගුවන් යානයක් මගින් මහ රැජිනගේ දේහය ස්කොට්ලන්තයේ සිට ලන්ඩන් නුවර දක්වා රැගෙන ඒමට නියමිතයි.
ලන්ඩන් නුවරදී දේහය තැන්පත් කිරීමට නියමිතව ඇත්තේ වසර 1000කට අධික පෞරාණික වටිනාකමකින් යුත් වෙස්මිනිස්ටර් ශාලාවේයි.
මහ රැජිනගේ ස්වාමියා වූ පිලිප් කුමරුගේ දේහය මිහිදන් කර ඇති සොහොන් කොත පසෙකින් මහ රැජිනගේ දේහය මිහිදන් කෙරෙනු ඇති.
