ඔස්ටේ්‍රලියාව බ්‍රිතාන්‍ය කිරීටයෙන් ඉවත්ව ජනරජයක් බවට පත්විය යුතු කතිකාවත 02 වන එළිසබෙත් රැජිණගේ අභාවයත් සමග නැවත කරළියට පැමිණ තිබෙනවා.
ස්වාධීන රජයක් සහ අග්‍රාමාත්‍යවරයෙකු සිටියද ඔස්ටේ්‍රලියාව – කැනඩාව – නවසීලන්තය ඇතුලු රටවල් 15 ක් තවමත් සිය රාජ්‍ය නායකයා ලෙස සළකන්නේ බ්‍රිතාන්‍යයේ රජකමට පත්වන තැනැත්තා හෝ තැනැත්තියයි.
ඔස්ටේ්‍රලියා ආණ්ඩුකාර ජනරාල්වරයා පත් කරනුයේ රජුගේ හෝ රැජිණගේ නියෝජිතයා ලෙස වන අතර පාලන තන්ත්‍රයේ වෙනස්විම් – ඇමති ධුර සංශෝධන ඇතුලු සියල්ල ඔහුගේ අනුමැතියට යටත්විය යුතුයි.
මෙම තත්වයෙන් මිදී ස්වාධීන ජනරජයක් බවට පත්විය යුතු බවට දීර්ඝ කාලයක සිට කතිකාවතක් පවතින අතර ඊට පක්ෂව සහ විපක්ෂව අදහස් දැක්වීම් දැකගත හැකි වනවා.
1999 වසරේදී මේ පිළිබඳ ජනතා මතය විමසීම සඳහා ජනමත විචාරණයක්ද පැවති නමුත් එහිදී බහුතරයක් පවසා තිබුණේ තවදුරටත් බ්‍රිතාන්‍ය කිරීටය යටතේ සිටිය යුතු බවටයි.
කෙසේවෙතත් රැජිණගේ අභාවයත් සමග එම මාතෘකාව නැවතත් කරළියට පැමිණ තිබෙනවා.
ග්‍රීන්ස් පක්ෂයේ නායක ඇඩම් බෑනඩ් පැවසුවේ ඔස්ටේ්‍රලියාවට ජනරජයක් බවට පත්වීමට සුදුසුම කාලය එළැඹ ඇති බවයි.
කෙසේවෙතත් මෙම අවස්ථාවේ මෙවැනි දේශපාලන මාතෘකා සාකච්ඡා කිරීමට සුදුසු නැතැයි අගමැති ඇන්තනී ඇල්බනීස් ඊයේ සඳහන් කර තිබුණා.
