මේ වන විට පවතින අති දුෂ්කර වාතාවරණයෙන් ගොඩ ඒමට ඉදිරි මාස පහ හය අතර කාලයේදී ශ්‍රී ලංකා ආර්ථිකයට හැකි වනු ඇතැයි මහ බැංකු අධිපති ආචාර්ය නන්දලාල් වීරසිංහ පවසනවා.
ඒ සඳහා සහය වීමට සමස්ත පුරවැසියන් ඉවසීමෙන් කටයුතු කළ යුතු බවයි ඔහු අවධාරණය කලේ.
සී.එන්.එන් රූපවාහිනී නාලිකාව සමග සම්මුඛ සාකච්ඡාවකට එක්වෙමින් ඔහු මෙම අදහස් පළකලා.
ශ්‍රී ලංකා මහ බැංකුව සතුව ඇති විදෙස් මුදල් සංචිත බොහෝ විට ප්‍රමාණවත් විය හැක්කේ ඉදිරි සති දෙකක හෝ තුනක කාලයකට ඉන්ධන සහ ගෑස් ආනයනය සඳහා පමණක් බවත් මහ බැංකු අධිපතිවරයා මෙහිදී අනාවරණය කළා.
ජාත්‍යන්තර මූල්‍ය අරමුදල මගින් ලබාදෙනු ලබන මූල්‍ය ප්‍රතිපාදන මෙරටට ලැබීමට ලබන දෙසැම්බරය තෙක් බලා සිටීමට සිදුවන බවත් ආචාර්ය නන්දලාල් වීරසිංහ කියාසිටියා.
ජාත්‍යන්තර මූල්‍ය අරමුදල සමග වන පළමු වටයේ ගිවිසුම් ගතවීම මේ මාසය අවසන් වීමට පෙර සිදු කර ගත හැකි වනු ඇති බවයි ඔහු සඳහන් කලේ.
තවදුරටත් පොලී අනුපාත ඉහළ දැමීමේ සූදානමක් මේ මොහොතේ මහ බැංකු සැලසුම් තුළ නොමැති බවත් මහ බැංකු අධිපතිවරයා පවසා සිටියා.
