දකුණු ඔස්ටේ්‍රලියා ප්‍රාන්ත මැතිවරණයේදී ලිබරල් සන්ධානය ලැබු පරාජය ෆෙඩරල් මැතිවරණයට බලපෑමක් එල්ල නොකරන බව අගමැති ස්කොට් මොරිසන් පවසනවා.
එම පරාජයට හේතුවූයේ ප්‍රාන්තය තුළ පැවති ඇතැම් කරුණු මිස ජාතික මට්ටමේ ගැටලු නොවන බවයි අගමැතිවරයා පෙන්වා දෙන්නේ.
දකුණු ඔස්ටේ්‍රලියා හිටපු අගමැති ස්ටීවන් මාර්ෂල්ගේ ක්‍රියා කලාපයද අගමැති මොරිසන් මෙහිදී ඇගයීමට ලක් කලා.
ඊයේ පැවති දකුණු ඔස්ටේ්‍රලියා ප්‍රාන්ත මැතිවරණයෙන් විපක්ෂ ලේබර් පක්ෂය ජයගත් අතර රජයක් පිහිටුවීමට අවශය ආසන සංඛ්‍යාව ඔවුන් දැනටමත් තහවුරු කරගෙන අවසන්.
කෙසේවෙතත් විචාරකයන් පෙන්වා දෙන්නේ බොහෝ දුරට මැයි මාසයේදී පැවැත්වෙනු ඇති බවට අනාවැකි පළවන ෆෙඩරල් මැතිවරණ ප්‍රථිඵලය පිළිබඳ ඉගියක් ඊයේ පැවති මැතිවරණයෙන් ලබාදී ඇති බවයි.
