නවසීලන්තයේ සුපිරි වෙළෙඳසැලකට ඇතුළු වී එහි සිටි පිරිසකට තියුණු ආයුධයකින් ප්‍රහාරයක් සිදුකළ ශ්‍රී ලාංකිකයාගේ තොරතුරු අනාවරණය කර තිබේ.
32 හැවිරිදි වියේ පසුවූ ඔහු මඩකලපුව, කාත්තන්කුඩි ප්‍රදේශයේ පදිංචි මොහොමඩ් මොහොමඩ් සම්සුදීන් අදිල් නමැති පුද්ගලයෙකු බවට ලාංකික බුද්ධි අංශ තොරතුරු අනාවරණය කරගෙන ඇත.
අදාළ තැනැත්තා සම්බන්ධයෙන් ශ්‍රී ලංකා අපරාධ පරීක්ෂණ දෙපාර්තමේන්තුවද විමර්ශන ආරම්භ කර තිබෙනවා.
පොලිසිය පැවසුවේ අදාළ තැනැත්තාට සමීප තැනැත්තන්ගෙන් තොරතුරු ලබා ගනිමින් සිටින බවයි.
මෙම පුද්ගලයා 2011 වසරේදී ශිෂ්‍ය වීසා මත ශ්‍රී ලංකාවෙන් පිටව ගිය බවටයි හෙළි වී ඇත්තේ.
කෙසේවෙතත් මොහුගේ අනන්‍යතාවය මේ දක්වා නවසීලන්ත බළධාරීන් විසින් නිල වශයෙන් ප්‍රකාශයට පත් කර නැහැ.
සැකකරු මීට ඉහතදී ද පිහි ප්‍රහාරයක් සම්බන්ධයෙන් අත්අඩංගුවට ගෙන පසුව මුදාහරිනු ලැබූවෙකු බව තහවුරු වී තිබෙනවා.
අයි එස් මතවාදය සහිත මොහු නවසීලන්තයේ ඕක්ලන්ඩ් නුවර සුපිරි වෙළෙඳසැලකට ඇතුළුව එහි සිටි පිරිසකට තියුණු ආයුධයකින් පහරදුන් අතර එහිදී පුද්ගලයින් 6 දෙනෙකු තුවාල ලැබූ බව නවසීලන්ත මාධ්‍ය වාර්තා කළේය.
අන්තවාදය පැතිරවීම, තියුණු ආයුධ ළඟ තබාගැනීම, කෘෘරත්වය ප්‍රවර්ධනය කිරීමේ ආදී චෝදනා හේතුවෙන් 2016 වර්ෂයේ සිට නවසීලන්ත ආරක්ෂක අංශ ඔහු පිළිබඳව දැඩි අධීක්ෂණයකින් සිට ඇත.
2017 වර්ෂය වන විට එරට ආරක්ෂක අංශ සම්සුදීන් අදිල්ට එරෙහිව චෝදනා 23ක් ගොනු කර තිබේ.
