මෙල්බර්න් හි පාසලකින් කුඩා දරුවෙකු පැහැරගෙන ගිය බවට වන චෝදනා මත කාන්තාවක් අත්අඩංගුවට ගෙන තිබෙනවා.
මෙල්බර්න් හි ෆිට්ස්රෝයි හි ජෝර්ජ් වීදියේ ප්‍රාථමික පාසලකින් දරුවෙකු අනවසරයෙන් රැගෙන ගිය බවටයි 35 හැවිරිදි කාන්තාවට චෝදනා එල්ලවී ඇත්තේ.
පොලිසිය ප්‍රකාශ කළේ සැකකාරිය අද උදෑසන 9ට පමණ ප්‍රාථමික පාසලට ගොස් පස් හැවිරිදි දැරියක් රැගෙන ගොස් ඇති බවයි.
මෙම කාන්තාව පෙරවරු 9.40ට පමණ බ්‍රන්ස්වික් වීදියේ ඇතර්ටන් උද්‍යානය වෙත දරුවා සමඟ පා ගමනින් ගොස් ඇති බව පොලිසිය සඳහන් කළා.
අධ්‍යාපන දෙපාර්තමේන්තු ප්‍රකාශකයෙකු පැවසුවේ ප්‍රාථමික පාසලේ බලධාරීන් මෙම සිදුවීම පිළිබඳව දැනගත් වහාම පොලිසියට දැනුම් දුන් බවයි.
පසුව එම කාන්තාව සහ දරුවා උද්‍යානයේ සිටින ආකරය දුටු මහජනතාව විසින් පොලිසියට කළ දැනුම් දීමකට අනුවයි සැකකාරිය අත්අඩංගුවට ගනු ලැබුවේ.
දැරියට සුළු තුවාල සිදුවී ඇති අතර ඇය රෝහල් ගත කර තිබෙනවා.
මෙම කාන්තාව දැරිය පැහැරගෙන යාම සම්බන්ධයෙන් චෝදනා එල්ලවී ඇති අතර ඇය අද රාත්‍රියේ මෙල්බර්න් මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
