ඔස්ට්‍රේලියාවේ වංචා වැළැක්වීමේ නීති (Spam law) කඩ කිරීමේ චෝදනාව මත කොමන්වෙල්ත් බැංකුවට පණවන ලද ඩොලර් මිලියන 3.55 ක වාර්තාගත දඩයක් ඔවුන් විසින් ගෙවා තිබෙනවා.
ඔස්ට්‍රේලියානු මාධ්‍ය සහ සන්නිවේදන අධිකාරිය විසින් සිදුකල විමර්ශනයකදී අනාවරණය වී තිබුණේ කොමන්වෙල්ත් බැංකුව විසින් ව්‍යාපාර ප්‍රවර්ධන ඊ-මේල් පණිවුඩ මිලියන 61 ක් පමණ සිය ගණුදෙනුකරුවන්ගේ අනුමැතියකින් තොරව ඔවුන් වෙත යවා ඇති බවයි.
එමෙන්ම unsubscribe පහසුකම නොමැතිව තවත් ඊ-මේල් පණිවුඩ මිලියන 04 ක් පමණද ඔවුන් විසින් යොමු කර ඇති බවටයි තවදුරටත් හෙළි වන්නේ.
ගනුදෙනුකරුවන් විසින් unsubscribe කර තිබියදී පවා කොමන්වෙල්ත් බැංකුව විසින් ඊ-මේල් පණිවුඩ 5,000 ක් පමණ යවා ඇති බවද තහවුරු කරගෙන තිබෙනවා.
මෙය ඔස්ට්‍රේලියාවේ වංචා වැළැක්වීමේ නීති සිතා මතා කඩ කිරීමක් බවට චෝදනා කරමිනුයි ඔස්ට්‍රේලියානු මාධ්‍ය සහ සන්නිවේදන අධිකාරිය විසින් මෙම නීති ක්‍රියාමාර්ගය ගෙන තිබුණේ.
