ස්වදේශික හඩ ජනමත විචාරණය සම්බන්ධයෙන් අගමැති ඇන්තනී ඇල්බනීස් විසින් අද පස්වරුවේ විශේෂ ප්‍රකාශයක් සිදුකිරීමට නියමිතයි.
1967 වසරේ පැවති ජනමත විචාරණයේදී යොදාගත් ඇතැම් ප්‍රකාශ ඇඩිලේඩ් නුවර පැවැත්වෙන මෙම වැඩසටහනේදී අගමැතිවරයා විසින් නැවතත් ඉදිරිපත් කරනු ඇති බව සඳහන්.
ස්වදේශික ජනතාව ඔස්ට්‍රේලියාවේ ජාතික ජනගහණයේ කොටසක් ලෙස සැළකිය යුතුද යන්න 1967 වසරේ පැවති ජනමත විචාරණයේදී විමසා බැලුණු අතර එහිදී ජනතාවගෙන් සියයට 90 ක් ඊට අනුමැතිය පළකරනු ලැබුවා.
ඔස්ට්‍රේලියානු නියෝජිත මන්ත්‍රී මණ්ඩලය විසින් ස්වදේශික හඩ ජනමත විචාරණ යෝජනාව සම්මත කර ලබන මාසය අග වනවිට සෙනෙට් සභාව වෙත යොමු කරනු ඇති බව සඳහන්.
එහිදීද අනුමැතිය ලදහොත් බොහෝ දුරට ලබන ඔක්තෝබර් සහ නොවැම්බර් අතර කාලයේදී මෙම යෝජනාව ජනමත විචාරණයකට යොමු කෙරෙනු ඇති බවටයි අනාවැකි පළවන්නේ.
