ඇස්ට්‍රා සෙනෙකා එන්නත් ලබා ගැනීම සඳහා ශ්‍රී ලංකා රජය ඔස්ටේ්‍රලියාවෙන්ද ඉල්ලීමක් කර තිබෙනවා.
ඒ පිළිබඳව ධනාත්මකව සළකා බලන බවයි විදේශ අමාත්‍ය මරිස් පේන්වි, ශ්‍රී ලංකා විදේශ අමාත්‍ය දිනේෂ් ගුණවර්ධනට සහතිකවී ඇත්තේ.
දෙපාර්ශවය අතර පැවති දුරකථන සංවාදයකදී මෙම අදහස් පළවී තිබෙනවා.
කොවිඩ්19 වසංගතය හේතුවෙන් ඇති වූ අභියෝගයන්ට මුහුණ දීම සඳහා ඔස්ටේ්‍රලියාව ශ්‍රී ලංකාව වෙත ලබා දෙන සහයෝගය පිළිබඳව අමාත්‍යවරයා මෙහිදී කෘතඥතාව පළ කල බව ශ්‍රී ලංකා විදේශ අමාත්‍යංශය නිකුත් කල නිවේදනයක සඳහන්.
ලබන වසරේ අප්‍රේල් මාසයේ දී ශ්‍රී ලංකාව සහ ඔස්ටේ‍රලියාව අතර ද්විපාර්ශ්වික සබඳතා පිහිටුවා ගැනීම පිළිබඳ 75 වැනි සංවත්සරය සැමරීම සඳහා සුදුසු වැඩසටහන් ක්‍රියාත්මක කිරීමට ද අමාත්‍යවරුන් එකග වී තිබෙනවා.
එක්ස්ප්‍රස් පර්ල් නෞකාව නිසා සිදුවන පාරිසරික හානිය අවම කිරීම පිණිස ශ්‍රී ලංකාවට තාක්ෂණික සහාය ලබා දීම සඳහා ද ඔස්ටේ්‍රලියා විදේශ අමාත්‍ය මරිස් පේන් ඉදිරිපත් වී තිබෙනවා.
