අමෙරිකානු ඩොලර් බිලියන 44 ක මුදලකට ට්විටර් සමාජ ජාලය ලොව වඩාත් ධනවත්ම පුද්ගලයා වන ටෙස්ලා සමාගමේ නිර්මාතෘ ඉලොන් මස්ක් ට අලෙවි කිරීමට ට්විටර් අධ්‍යක්ෂ මණ්ඩලය එකග වී තිබෙනවා.
දැනට එහි කොටස් ලාභියෙකු පමණක් වන මස්ක් මීට සති 02 කට ඉහතදී අනාවරණය කලේ තමා ටිවිටර් සමාගමේ සියලු කොටස් මිළදී ගැනීමට සූදානම් බවයි.
ඊට එහි විධායක මණ්ඩලය පළමුවෙන් එකග නොවූ නමුත් ඊයේ දිනයේදී අවසන් කැමැත්ත පළවී ඇති බවයි විදෙස් වාර්තා සඳහන් කලේ.
කොටස් හිමියන්ගේ අනුමැතියද හිමිවීමෙන් පසු ට්විටර් සමාජ ජාලය ඉලොන් මස්ක් ට අලෙවි කිරීම සිදුවනු ඇති.
මේ අනුව තනි පුද්ගල හිමිකාරිත්වය සහිත සමාගමක් බවට ට්විටර් පත්වන අතර කොටස් ලාභීන්ට එක් කොටසක් සඳහා ඩොලර් 54.20 ක මුදලක් හිමිවීමට නියමිතයි.
ෆෝබ්ස් සගරාවට අනුව ලොව වඩාත් ධනවත්ම පුද්ගලයා ලෙස සැළකෙන්නේද ඉලොන් මස්ක් වන අතර ඔහුගේ දළ වත්කම ඩොලර් බිලියන 273.6 ක්.
ව්‍යාජ ගිණුම් ඉවත් කිරීම ඇතුලු නව ප්‍රතිසංස්කරණ රැසක් ට්විටර් සමාජ ජාලයට හඳුන්වා දෙන බවටයි ඉලොන් මස්ක් විසින් පොරොන්දු වී ඇත්තේ.
