විදෙස්ගතව සිට ශ්‍රී ලංකාවට පැමිණෙන පුද්ගලයන්ට අදාළ නව නිරෝධායන රෙගුලාසි ඇතුළත් චක්‍රලේඛයක් සෞඛ්‍ය සේවා අධ්‍යක්ෂ ජනරාල්වරයා විසින් නිකුත් කර තිබෙනවා.
ඒ අනුව ලාංකික පුරවැසියන් දිවයිනට පැමිණීමට පැය 96 කට පෙර ලබාගත් සෘණාත්මක පී සී ආර් වාර්තාවක් හෝ පැය 48 කට පෙර ලබාගත් රැපිඩ් ඇන්ටිජන් පරීක්ෂණ වාර්තාවක් ඉදිරිපත් කිරීම අනිවාර්ය වනවා.
විදේශිකයන් හෝ ද්විත්ව පුරවැසිලාභීන් පැය 96 කට පෙර ලබාගත් සෘණාත්මක පී සී ආර් වාර්තාවක් ඉදිරිපත් කල යුතුයි.
ලබාගත් එන්නත් මාත්‍රා පිළිබඳ තොරතුරු ඇතුළත් කාඩ්පත ඉංග්‍රීසී භාෂාවෙන් පමණක් ඉදිරිපත් කිරීම අනිවාර්ය වනු ඇති.
දිවයිනට පැමිණි පළමු දිනයේදීම ඔවුන් පී සී ආර් පරීක්ෂණයකට යොමුවිය යුතු අතර දින 14 ක් අදාළ හෝටලයක හෝ නිරෝධායන මධ්‍යස්ථානයක නිරෝධායනය විය යුතුයි.
රාජ්‍ය තාන්ත්‍රිකයන්ට එම තානාපති කාර්යාල විසින් වෙන් කරන ලද නිල නිවාසතුළදී නිරෝධායන කාලසීමාව ගත කල හැකි වනවා.
එමෙන්ම පූර්ණ එන්නත්කරණයට ලක් කර දින 14 කට පසු පැමිණෙන ශ්‍රී ලාංකිකයන් හෝ ද්විත්ව පුරවැසියන් ඒ පිළිබඳ වහා සෞඛ්‍ය අංශ දැනුවත් කල යුතු බවයි සෞඛ්‍ය සේවා අධ්‍යක්ෂ ජනරාල්වරයා විසින් නිකුත් කර ඇති චක්‍රලේඛයේ දක්වා ඇත්තේ.
