ජාත්‍යන්තර සිසුන් දකුණු ඔස්ට්‍රේලියානු ප්‍රාන්තය වෙත ගෙන ඒමට ප්‍රාන්ත රජය දියත් කළ සැලසුමට ඔස්ට්‍රේලියානු මධ්‍යම රජයේ අනුමැතිය හිමිවී තිබේ.
ඔස්ට්‍රේලියානු දේශ සීමා තවමත් වසා දමා ඇති බැවින් දකුණු ඔස්ට්‍රේලියානු ප්‍රාන්තයට පැමිණෙන ජාත්‍යන්තර සිසුන් තම ගුවන් ගමන් සඳහා මෙන්ම නිරෝධායන කටයුතු සඳහා ද යන වියදම් තමන් විසින්ම දැරිය යුතු බව දකුණු ඔස්ට්‍රේලියානු ප්‍රාන්ත රජය පවසයි.
දැනට විදෙස්ගතව සිට දකුණු ඔස්ට්‍රේලියානු ප්‍රාන්තයට පැමිණෙන ඔස්ට්‍රේලියානුවන්ට අනුගමනය කරන පොදු නිරෝධායන නීති හා රෙගුලාසි මෙම ජාත්‍යන්තර සිසුන්ටද අදාළ වන බව සඳහන්.
මෙලෙස පැමිණෙන ජාත්‍යන්තර සිසුන්ව නිරෝධායනය කිරීම සඳහා Parafield හි පිහිටි Flight Training Adelaide කලාපය යොදාගැනීමට තීරණය කර ඇත.
දැනට දකුණු ඔස්ට්‍රේලියානු ප්‍රාන්ත රජය විසින් සතිපතා අවසරදී ඇති දකුණු ඔස්ට්‍රේලියාවට නැවත පැමිණෙන ඔස්ට්‍රේලියානු ජාතිකයින්ගේ සංඛ්‍යාවට අමතරව මෙම ජාත්‍යන්තර සිසුන් ගෙන්වා ගැනීම සිදුවන බව සඳහන්.
ජාත්‍යන්තර සිසුන් දකුණු ඔස්ට්‍රේලියා ප්‍රාන්තයේ ආර්ථිකයට වැදගත් සාධකයක් බවත් 2019 වසරේදී ඔවුන් ප්‍රාන්ත ආර්ථිකයට ඩොලර් බිලියන 2කට අධික මුදලක් දායක කළ බවත් දකුණු ඔස්ට්‍රේලියා ප්‍රාන්ත අගමැති Steven Marshall නිවේදනයක් නිකුත් කරමින් පැවසීය.
Pic -www.insurancebusinessmag.com
