ඔස්ට්‍රේලියාවේ පාරිභෝගිකයින්ට Ghost Stores ලෙස හදුන්වන ව්‍යාජ වෙළඳසැල් වෙබ් අඩවි පිලිබඳව අවධානයෙන් සිටින ලෙස ඔස්ට්‍රේලියානු පාරිභෝගික ආරක්ෂණ කොමිසම අනතුරු අඟවා තිබෙනවා.
මෙම ව්‍යාජ වෙබ් අඩවි ඔස්ට්‍රේලියාවේ ලියාපදිංචි ව්‍යාපාර ලෙස පෙනී සිටින අතර විදේශ රටවල සිටින පුද්ගලයන් විසින් මෙහෙයවන බවටයි අනාවරණය වී තිබෙන්නේ.
මේ වන විට ව්‍යාජ වෙබ් අඩවි හතරක් හදුනාගෙන ඇති අතර ඒ සදහා everly-melbourne.com,willowandgrade-adelaide.com ,sophie-claire.com සහ doublebayboutique.com යන වෙබ් අඩවි ඇතුලත් වන බව පාරිභෝගික ආරක්ෂණ කොමිසම තහවුරු කර සිටියා.
මෙම වෙළදසැල් Facebook, Instagram මාධ්‍ය වල paid ads මගින් සහ Shopify e-commerce භාවිතා කරමින් ගනුදෙනුකරුවන් වෙත ව්‍යාජ ඇඳුම් හා පාවහන් දැන්වීම් යවන බවටයි තොරතුරු වාර්තා වන්නේ.
පාරිභෝගික ආරක්ෂණ කොමිසමේ නියෝජ්‍ය සභාපති කැට්‍රියෝනා ලෝ කියා සිටියේ මෙවැනි වෙළඳසැල් 60කට අදාළව පැමිණිලි 360ක් වාර්තා වී ඇති බවයි.
මේ වන විටත් ghost stores ක්‍රියාකරුවන්ට එරෙහිව පරීක්ෂණ සිදුකර නිසි පියවර ගන්නා ලෙස ඉල්ලා Meta සහ Shopify යන සමාගම් වෙත ලිපි යොමු කල බවද ඇය වැඩිදුරටත් කියා සිටියා.
ඔස්ට්‍රේලියානුවන්ට මෙම ව්‍යාජ ව්‍යාපාර හඳුනා ගන්නේ කෙසේදැයි දැන ගැනීමට සහ බාල නිෂ්පාදනයක් මිලදී ගැනීමෙන් වැළකී සිටීමට මහජන දැනුවත්භාවය වැඩි කිරීමට පියවර ගන්නා බව පාරිභෝගික ආරක්ෂණ කොමිසම දන්වා සිටියා.
